Qindra dronë ukrainas janë drejtuar gjatë natës drejt rajonit të Moskës, duke shkaktuar dëme materiale dhe duke plagosur dy persona, sipas autoriteteve ruse.
Kryebashkiaku i Moskës, Sergey Sobyanin, deklaroi përmes një postimi në Telegram se Ukraina ka lëshuar më shumë se 400 dronë drejt rajonit të kryeqytetit rus. Sipas tij, shumica e tyre janë neutralizuar në periferi të Moskës, ndërsa 85 dronë janë rrëzuar gjatë afrimit drejt qytetit.
Agjencia shtetërore ruse e lajmeve TASS e cilësoi sulmin si “një nga sulmet më të mëdha” të Ukrainës ndaj Moskës në vitet e fundit.
Guvernatori i rajonit të Moskës, Andrey Vorobyov, tha se dy persona janë plagosur. Njëri prej tyre, sipas tij, u lëndua pasi një shtëpi private mori flakë në zonën e Domodedovos, ndërsa personi tjetër u plagos në një autostradë pasi një dron ra pranë një automjeti.
Sipas autoriteteve ruse, sistemet e mbrojtjes ajrore dhe ato të luftës elektronike kanë penguar sulmin. Dëmet më të mëdha janë raportuar në zonat Podolsk, Domodedovo dhe Odintsovo, ku mbetjet e dronëve kanë dëmtuar disa banesa private, kanë shkaktuar zjarre dhe kanë prekur infrastrukturën civile.
Ministria e Mbrojtjes së Rusisë pretendoi se forcat ruse kanë rrëzuar gjithsej 381 dronë ukrainas gjatë sulmit të natës.
Ndërkohë, Ukraina ka bërë të ditur një tjetër bilanc të sulmeve ajrore, duke akuzuar Rusinë se ka lëshuar gjatë natës dy raketa të drejtuara nga avionë dhe 94 dronë. Forcat ajrore ukrainase pretendojnë se mbrojtja ajrore e vendit ka shkatërruar 81 dronë rusë.
Sulmet e ndërsjella me dronë janë intensifikuar gjatë muajve të fundit, duke u shndërruar në një nga format kryesore të përballjes mes dy vendeve, me goditje që tashmë prekin edhe zona larg vijës së frontit.
