Prokuroria Themelore në Prishtinë ka kërkuar caktimin e masës së paraburgimit ndaj një shtetasi të Republikës së Serbisë, i dyshuar për veprën penale “Importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materiale plasëse”.
Sipas njoftimit të Prokurorisë, i dyshuari me inicialet Z.M. është arrestuar në flagrancë më 22 korrik 2026, pas zhvillimit të hetimeve intensive dhe grumbullimit të provave materiale, me urdhër të Prokurorit të Shtetit.
Prokuroria bën të ditur se, bazuar në hetimet e deritanishme, armët e zjarrit dyshohet se janë importuar nga Republika e Serbisë dhe më pas janë modifikuar në kundërshtim me legjislacionin në fuqi në Kosovë.
Me vendim të Prokurorit të Shtetit, ndaj të dyshuarit fillimisht është caktuar masa e ndalimit për 48 orë, ndërsa më 23 korrik 2026 Prokuroria ka paraqitur në gjykatën kompetente kërkesën për caktimin e paraburgimit.
Prokuroria Themelore në Prishtinë ka theksuar se mbetet e përkushtuar në luftimin e kriminalitetit, forcimin e sundimit të ligjit dhe vënien para drejtësisë të të gjithë personave që dyshohen për shkelje të ligjit.
