Prokuroria Themelore në Prishtinë ka ndaluar tre persona në kuadër të hetimeve për aksidentin tragjik në një vendpunishte në kryeqytet, ku si pasojë e rrëzimit të një vinçi humbi jetën një punëtor 26-vjeçar, ndërsa një tjetër mbeti i lënduar rëndë.
Sipas njoftimit të Prokurorisë, të ndaluarit janë:
- A.Sh., i dyshuar për veprën penale “Shkaktimi i rrezikut të përgjithshëm”;
- B.S., në cilësinë e personit përgjegjës të kompanisë ndërtuese;
- E.E., në cilësinë e përfaqësuesit të kompanisë investuese të projektit.
Dy të fundit dyshohen për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.
Prokuroria bëri të ditur se është njoftuar për aksidentin më 28 korrik, rreth orës 15:00, ndërsa menjëherë pas marrjes së informacionit, prokurori kujdestar ka dalë në vendin e ngjarjes së bashku me Policinë e Kosovës, Njësinë Rajonale të Hetimeve dhe Inspektoratin e Punës.
Për zbardhjen e plotë të rastit, me urdhër të Prokurorit të Shtetit janë angazhuar ekspertë të pavarur të sigurisë në punë dhe një ekspert i inxhinierisë mekanike. Gjithashtu janë siguruar prova materiale, janë sekuestruar pamjet e kamerave të sigurisë dhe është kryer ekzaminimi forenzik i vendit të ngjarjes.
Hetuesit kanë intervistuar dëshmitarët okularë dhe punëtorin e lënduar, i cili vazhdon trajtimin mjekësor në Qendrën Klinike Universitare të Kosovës (QKUK).
Si pasojë e aksidentit, jetën e humbi E.Sh., 26 vjeç, ndërsa një punëtor tjetër pësoi lëndime të rënda trupore.
Lidhur me rastin, Prokuroria ka iniciuar hetime për veprat penale “Shkaktimi i rrezikut të përgjithshëm” dhe “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.
Brenda afatit ligjor, Prokuroria do të vendosë për kërkesën për caktimin e masave të sigurisë ndaj të dyshuarve, ndërsa hetimet do të vazhdojnë deri në sqarimin e plotë të rrethanave që çuan në aksidentin fatal.
