Policia e Kosovës ka arrestuar dy persona të dyshuar për përfshirje në plagosjen me armë zjarri që ndodhi në orët e para të 28 korrikut në rrugën “Xheladin Hana” në Prishtinë, ku mbeti i plagosur një person.
Sipas njoftimit të Policisë, pas një pune intensive hetimore, zyrtarët e Sektorit të Hetimeve të Kryeqytetit kanë identifikuar dhe arrestuar dy të dyshuarit për veprën penale “Lëndim i rëndë trupor”.
Të arrestuarit janë A.K., 36 vjeç, dhe A.Xh., 36 vjeç.
Pas intervistimit, me vendim të Prokurorit të Shtetit, të dyshuarve u është caktuar masa e ndalimit për 48 orë.
Ngjarja kishte ndodhur rreth orës 02:00 të mëngjesit të 28 korrikut në rrugën “Xheladin Hana”, ku si pasojë e të shtënave me armë zjarri një person mbeti i plagosur dhe u dërgua për trajtim mjekësor.
Policia kishte nisur menjëherë hetimet, të cilat çuan në identifikimin dhe arrestimin e dy të dyshuarve, ndërsa rasti vazhdon të hetohet.
