Anëtarja e Kryesisë së Lidhjes Demokratike të Kosovës (LDK), Jehona Lushaku-Sadriu, ka deklaruar se partia e saj nuk ka paraqitur asnjë kërkesë për poste ministrore në kuadër të bisedimeve me Lëvizjen Vetëvendosje (LVV) për një marrëveshje të mundshme politike.
Duke folur në emisionin “DPT te Fidani” në Klan Kosova, ajo tha se diskutimet janë ende në fazën fillestare dhe se aktualisht nuk ekziston një marrëveshje politike mes dy subjekteve.
“Nuk kemi kërkesa për ministra”
Lushaku-Sadriu theksoi se në këtë fazë fokusi i LDK-së nuk është ndarja e posteve qeveritare, por çështjet që lidhen me formimin e institucioneve.
“Në këtë fazë nuk kemi kërkesë. Kërkesa jonë tani ka të bëjë me formimin e presidentit, meqë aty jemi si parti politike që kërkojmë ose kemi peshën e votës dhe kërkohen votat tona për përbërjen e presidentit. Nëse kjo na çon te diskutimi edhe për qeverinë, pastaj do të diskutojmë”, deklaroi ajo.
Fillimisht marrëveshje për programin
Sipas saj, përpara çdo diskutimi për ndarjen e përgjegjësive qeveritare duhet të ketë dakordim për çështjet themelore politike dhe programore.
Ajo theksoi se partnerët e mundshëm duhet të harmonizojnë qëndrimet për prioritetet e vendit, orientimin strategjik dhe programin e ardhshëm qeverisës, ndërsa vetëm më pas mund të hapet diskutimi për përbërjen e kabinetit.
Takimi Kurti–Abdixhiku
Lushaku-Sadriu u ndal edhe te takimi i paralajmëruar mes kryeministrit në detyrë Albin Kurti dhe kryetarit të LDK-së Lumir Abdixhiku, duke theksuar se qëllimi i tij është të sqarohen pozicionet e të dyja palëve.
Ajo shtoi se arritja e një marrëveshjeje do të varet nga gatishmëria për kompromis dhe ndërtimi i një partneriteti politik që do të mundësonte formimin e institucioneve të reja të Kosovës.
Takimi mes Kurtit dhe Abdixhikut pritet të zhvillohet nesër në orën 18:00 në Kuvendin e Kosovës dhe konsiderohet një hap i rëndësishëm në përpjekjet për zgjidhjen e ngërçit politik pas zgjedhjeve parlamentare. Burimi: Tv Klan Kosova – DPT te Fidani.
