Hennessey ka zbuluar zyrtarisht Blackbird, supermakinën e saj më të re, e cila sfidon trendin e elektrifikimit duke rikthyer formulën klasike të automobilizmit: motor V8 me aspirim natyral, kambi manual me gjashtë marshe dhe një kabinë pa ekrane dixhitale.
Modeli i ri mban emrin e avionit legjendar Lockheed SR-71 Blackbird dhe përfaqëson automjetin e tretë të zhvilluar plotësisht nga prodhuesi amerikan, pas Venom GT dhe Venom F5.
Në zemër të Blackbird ndodhet një motor 6.2-litërsh V8 me aspirim natyral, i zhvilluar në bashkëpunim me Ilmor Engineering. Motori pritet të prodhojë nga 800 deri në 850 kuaj fuqi, ndërsa kufiri maksimal i rrotullimeve kalon 9.000 rpm. E gjithë fuqia transmetohet te rrotat e pasme përmes një kutie manuale me gjashtë shpejtësi.
Falë një strukture të ndërtuar tërësisht nga fibra karboni, pesha e makinës synohet të jetë nën 1.360 kilogramë (më pak se 3.000 paund në peshë të thatë). Kjo i mundëson përshpejtimin nga 0 në 96 km/h për rreth 2,5 sekonda, ndërsa shpejtësia maksimale parashikohet të arrijë 354 km/h.
Blackbird mbështetet në një shasi të re me monokok karboni dhe përdor rrota 20 inç të dizajnuara ekskluzivisht për këtë model, të pajisura me goma Michelin Pilot Sport Cup 2 R. Në pjesën e pasme, elementët aktivë aerodinamikë hapen automatikisht mbi 111 km/h për të përmirësuar stabilitetin në shpejtësi të larta.
Dizajni kombinon linja moderne me elemente që kujtojnë supermakinat klasike. Profili aerodinamik, hyrjet e mëdha të ajrit, difuzori masiv dhe pasqyrat e montuara mbi shtyllat A i japin modelit një pamje agresive dhe futuriste.
Brendësia është ndërtuar me filozofinë “më pak teknologji, më shumë ndjesi”. Në vend të ekraneve të mëdha me prekje, shoferi përballet me pesë instrumente analogë, ku në qendër ndodhet takometri me shkallë deri në 10.000 rpm. Të gjitha komandat kryesore janë fizike, ndërsa leva metalike e kambios me portë të hapur është elementi kryesor i kabinës.
Sipas Hennessey, Blackbird ofron edhe më shumë komoditet se Venom F5, falë izolimit më të mirë akustik, pezullimit adaptiv dhe dukshmërisë së përmirësuar.
Prodhimi i modelit do të nisë në vitin 2029, pasi të përfundojë cikli i Venom F5. Kompania do të ndërtojë vetëm 71 njësi, me një çmim fillestar prej 2,5 milionë dollarësh për secilën, pa përfshirë taksat.
Blackbird do të homologohet për tregjet ndërkombëtare dhe do të jetë i disponueshëm edhe jashtë Shteteve të Bashkuara, duke u bërë një nga supermakinat më ekskluzive dhe më të rralla të viteve të ardhshme.
