Ministria e Industrisë, Ndërmarrësisë, Tregtisë dhe Inovacionit (MINTI) ka njoftuar se, duke filluar nga 6 gushti 2026, do të nisë kontrolle intensive në të gjithë zinxhirin e tregtimit të qumështit dhe produkteve të qumështit, me fokus verifikimin e përbërjes dhe etiketimit të tyre.
Sipas ministrisë, vendimi vjen pas gjetjeve të përcjella nga Agjencia e Ushqimit dhe Veterinarisë (AUV), të cilat kanë evidentuar raste të përdorimit të qumështit pluhur dhe vajit të palmës pa u deklaruar në etiketë, ose në sasi që nuk përputhen me ato të deklaruara.
Kontrollet do të kryhen nga Inspektorati Qendror i Mbikëqyrjes së Tregut (IQMT) në bashkëpunim me AUV-në dhe do të përfshijnë prodhuesit, importuesit, distributorët, depot, tregtinë me shumicë dhe pikat e shitjes me pakicë.
Çfarë do të kontrollohet?
Inspektorët do të verifikojnë:
- përputhshmërinë e përmbajtjes reale të produktit me etiketën;
- deklarimin e qumështit pluhur, vajit të palmës dhe përbërësve të tjerë;
- saktësinë e emërtimit dhe prezantimit të produkteve;
- dokumentacionin e lëndëve të para dhe gjurmueshmërinë e produkteve;
- produktet që mbahen ose ofrohen për shitje në treg.
Masa ndaj shkelësve
MINTI bën të ditur se produktet për të cilat analizat zyrtare vërtetojnë se etiketa nuk pasqyron përmbajtjen reale do të tërhiqen nga tregu, ndërsa operatorët ekonomikë përgjegjës do të përballen me masa administrative dhe ndëshkuese, përfshirë gjoba dhe sanksione të tjera të parashikuara me legjislacionin në fuqi.
Ministria u ka bërë thirrje të gjithë operatorëve ekonomikë që të sigurojnë se produktet që prodhojnë, importojnë, shpërndajnë apo shesin kanë përbërje, emërtim dhe etiketim të saktë, të qartë dhe të verifikueshëm.
Sipas MINTI-t, çdo deklarim i pasaktë ose mashtrues i përbërjes së produkteve cenon të drejtën e konsumatorëve për informim dhe do të trajtohet në përputhje me ligjin.
Ministria thekson se, në bashkëpunim me Agjencinë e Ushqimit dhe Veterinarisë, do të vazhdojë angazhimin për mbrojtjen e konsumatorit, garantimin e konkurrencës së drejtë në treg dhe ruajtjen e shëndetit publik në Kosovë.
