Presidenti i Shteteve të Bashkuara, Donald Trump, ka hedhur poshtë raportimet se rezervat e raketave të Pentagonit janë në rënie, duke deklaruar se ushtria amerikane disponon sasi të mëdha municionesh dhe po rrit me ritme të shpejta kapacitetet e prodhimit. Në të njëjtën kohë, Irani ka njoftuar se është në fazën përfundimtare të një marrëveshjeje me Omanin për rregullimin e lundrimit në Ngushticën e Hormuzit.
Sipas autoriteteve iraniane, po punohet për finalizimin e një marrëveshjeje që synon krijimin e një korridori detar për transportin në këtë rrugë strategjike. Zëdhënësi i Ministrisë së Jashtme të Iranit, Esmaeil Baqaei, tha se marrëveshja ndodhet në fazat përfundimtare, por nuk dha detaje shtesë.
Megjithatë, Baqaei theksoi se një dakordim me Omanin nuk garanton automatikisht sigurinë e lundrimit në Ngushticën e Hormuzit, duke argumentuar se situata mbetet e ndikuar nga bllokada amerikane ndaj porteve iraniane. Deri më tani, as Shtetet e Bashkuara dhe as Omani nuk kanë komentuar zyrtarisht mbi pretendimet e Teheranit.
Që nga përshkallëzimi i konfliktit mes SHBA-së, Izraelit dhe Iranit, autoritetet iraniane kanë kufizuar ndjeshëm qarkullimin në Ngushticën e Hormuzit, korridor përmes të cilit kalon rreth një e pesta e tregtisë globale të naftës dhe gazit natyror të lëngshëm.
Trump: SHBA ka rezerva të mëdha armësh
Presidenti Donald Trump reagoi gjithashtu ndaj raportimeve të mediave amerikane se rezervat e raketave mbrojtëse janë pakësuar, duke i cilësuar ato si të pavërteta.
Në një postim në platformën Truth Social, Trump deklaroi se Shtetet e Bashkuara disponojnë “sasi të mëdha municionesh”, veçanërisht të sistemeve më të rëndësishme të armatimit.
“SHBA-të kanë sasi të mëdha municioni. Për më tepër, prodhimi po rritet me ritme të shpejta dhe po furnizon vendin sipas nevojës”, shkroi ai.
Trump shtoi se industria amerikane e mbrojtjes po ndërton kapacitetet më të mëdha prodhuese në historinë e vendit.
Presidenti amerikan paralajmëroi gjithashtu masa ligjore ndaj personave që, sipas tij, kanë nxjerrë informacione të klasifikuara.
“Personat që kanë zbuluar këto informacione tradhtare po hetohen. Ata do të përballen me dënime të gjata me burg”, deklaroi Trump.
Zhvillimet vijnë në një kohë kur tensionet në Lindjen e Mesme mbeten të larta, ndërsa komuniteti ndërkombëtar po ndjek me vëmendje negociatat për rihapjen e plotë të Ngushticës së Hormuzit, një nga rrugët më të rëndësishme për furnizimin global me energji.
