Kapiteni i Kombëtares shqiptare, Berat Gjimshiti, është shumë pranë një aventure të re në karrierë. Mbrojtësi pritet të prezantohet si lojtari më i ri i klubit saudit Al Diriyah Club, pasi marrëveshja mes palëve është arritur dhe ka mbetur vetëm zyrtarizimi i transferimit.
Klubi italian Atalanta BC ka rënë dakord për shitjen e kartonit të Gjimshitit dhe pritet të përfitojë rreth 3 milionë euro nga operacioni.
Sipas raportimeve, Gjimshiti ka firmosur një marrëveshje paraprake për një kontratë dyvjeçare, ndërsa një nga faktorët kryesorë që ndikoi në vendimin e tij ishte oferta financiare nga Arabia Saudite, e cila parashikon një pagë të konsiderueshme për kapitenin kuqezi.
Ishte vetë mbrojtësi shqiptar ai që kërkoi largimin nga Atalanta, pasi kontrata e tij me klubin italian skadonte në fund të sezonit të ardhshëm.
Gjimshiti u bashkua me Atalantën në vitin 2016 dhe, pas disa periudhave huazimi, u shndërrua në një nga lojtarët më të rëndësishëm të skuadrës së Bergamos. Në total, ai ka zhvilluar 334 ndeshje me fanellën e Atalantës, duke qenë pjesë e një prej periudhave më të suksesshme në historinë e klubit.
Transferimi në Arabinë Saudite shënon një kapitull të ri për 33-vjeçarin, i cili prej vitesh ka qenë një nga figurat kryesore të Kombëtares shqiptare dhe një lider në repartin defensiv.
