Ministria e Infrastrukturës dhe Transportit ka njoftuar se të dielën do të kufizohet përkohësisht qarkullimi i automjeteve të transportit të mallrave me masë totale mbi 20 tonë. Kufizimi do të jetë në fuqi nga ora 11:00 deri në 17:30.
Ministria e Infrastrukturës dhe Transportit (MIT) ka njoftuar qytetarët dhe operatorët ekonomikë se, për shkak të temperaturave të larta të parashikuara për ditën e nesërme, do të vendosen kufizime të përkohshme në qarkullimin e automjeteve të transportit të mallrave.
Sipas njoftimit zyrtar, automjetet me masë totale mbi 20 tonë nuk do të lejohen të qarkullojnë në autoudhë nga ora 11:00 deri në 17:30, për shkak të parashikimit të temperaturave prej 32°C ose më shumë.
Kufizimi vlen vetëm për autoudhët.
Në rrugët nacionale, rajonale dhe lidhëse, qarkullimi do të vijojë pa kufizime.
Nga masa përjashtohen:
- automjetet e organeve të rendit dhe sigurisë publike;
- automjetet e shërbimeve emergjente;
- automjetet e institucioneve shëndetësore.
MIT u ka bërë thirrje operatorëve ekonomikë dhe drejtuesve të automjeteve të transportit që të respektojnë kufizimin dhe të planifikojnë lëvizjet e tyre në përputhje me orarin e përcaktuar.
Kufizimi synon të mbrojë infrastrukturën rrugore nga dëmtimet që mund të shkaktohen nga temperaturat e larta dhe ngarkesa e rëndë e automjeteve.
