Konjufca ka shprehur keqardhje për qëndrimin e presidentit ukrainas, duke theksuar se Kosova ka qenë vazhdimisht në krah të Ukrainës që nga nisja e agresionit të plotë rus në shkurt të vitit 2022.
Përmes një reagimi në platformën “X”, Konjufca ka renditur disa nga format e mbështetjes që Kosova i ka dhënë Ukrainës, përfshirë dënimin e agresionit rus, përafrimin me politikën e jashtme dhe të sigurisë së përbashkët të Bashkimit Evropian, vendosjen e sanksioneve ndaj Rusisë dhe Bjellorusisë, ndihmën humanitare dhe strehimin e gazetarëve ukrainas.
Ai ka përmendur gjithashtu ndihmën dhe trajnimin ushtarak të ofruar nga Kosova në mbështetje të mbrojtjes së Ukrainës.
“E bëmë këtë pavarësisht mosnjohjes së shtetit tonë nga Ukraina, sepse solidariteti me një popull që mbron lirinë, sovranitetin dhe integritetin e tij territorial është çështje parimore”, ka shkruar Konjufca.
Konjufca përmend edhe qëndrimin e Serbisë
Ministri i Jashtëm në detyrë ka theksuar se duhet bërë dallim mes qëndrimit të Kosovës dhe atij të Serbisë ndaj agresionit rus në Ukrainë.
Sipas tij, Kosova ka vendosur sanksione ndaj Rusisë dhe është përafruar me qëndrimet e Bashkimit Evropian, ndërsa Serbia nuk është përafruar me sanksionet e BE-së të vendosura ndaj Moskës si përgjigje ndaj luftës në Ukrainë.
Konjufca ka kundërshtuar gjithashtu çdo përpjekje për ta paraqitur Kosovën si precedent për pushtimin apo aneksimin e territoreve ukrainase nga Rusia.
“Pikërisht për këto arsye, përpjekjet e Rusisë për ta përdorur Kosovën si precedent apo justifikim për pushtimin, okupimin apo përpjekjen për aneksimin e territorit ukrainas janë historikisht dhe ligjërisht të pavërteta. Nuk ekziston një paralele e tillë”, ka deklaruar ai.
“Kosova nuk mund të paraqitet përmes integritetit territorial të Serbisë”
Konjufca ka thënë se Kosova mbetet e palëkundur në mbështetjen për sovranitetin, pavarësinë dhe integritetin territorial të Ukrainës.
Megjithatë, ai ka kundërshtuar që Republika e Kosovës të trajtohet “përmes prizmit të integritetit territorial të Serbisë”.
Sipas tij, një qëndrim i tillë do të ishte në kundërshtim me parimet që Ukraina po mbron në luftën kundër agresionit rus.
“Një vendim i tillë do t’i forconte pikërisht parimet e lirisë, demokracisë dhe të drejtës ndërkombëtare që vetë Ukraina po i mbron sot”, ka shkruar Konjufca.
Zelensky në Beograd: Ukraina nuk e njeh Kosovën
Reagimi i Konjufcës erdhi një ditë pas vizitës së presidentit ukrainas, Volodymyr Zelensky, në Serbi, ku ai u takua me presidentin serb, Aleksandar Vuçiq.
Gjatë konferencës për media, Zelensky deklaroi se qëndrimi i Ukrainës ndaj njohjes së Kosovës nuk ka ndryshuar.
Kosova ka qenë ndër vendet që ka shprehur mbështetje të vazhdueshme për Ukrainën që nga fillimi i pushtimit të plotë rus në vitin 2022.
Prishtina ka dënuar agresionin rus, ka vendosur sanksione ndaj Rusisë, ka ofruar ndihmë humanitare dhe mjekësore, ndërsa ka strehuar refugjatë ukrainas dhe ka krijuar programe mbështetëse për gazetarët ukrainas.
Pavarësisht kësaj mbështetjeje, Ukraina vazhdon të mos e njohë pavarësinë e Kosovës.
