Deputeti i Lëvizjes Vetëvendosje, Adnan Rrustemi thotë se “nuk ka dobi” të konstituohet Kuvendi, pa një marrëveshje për zgjedhjen e Presidentit.
Ai tha në Kosova Live në T7 se me konstituimin e Kuvendit do të niste një “fushatë elektorale.
“Nuk jep dobi ajo. Pastaj ajo është fushatë elektorale. Çdo ditë që kalon pastaj ti e di që je afër zgjedhjeve”, tha ai.
Rrustemi tha se “është e mundur” të arrihet një marrëveshje “nëse ka vullnet politik”.
“Dy ditë më parë thanë jemi shumë afër, më pas thanë jemi shumë larg. Unë nuk e di sa afër e sa larg mund të jemi. Në pikëpamjen tonë është e mundur që shumë shpejt të kemi një marrëveshje nëse ka vullnet politik”, tha ai.
“Duhet të pajtohemi për President konsensual dhe të ulemi të flasim për formatin e partneritetit apo bashkëpunimit”, tha Rrustemi.
Me kërkesë të kryeministrit në detyrë, kryetarit të LVV-së, Albin Kurti, seanca konstituive e Kuvendit që nisi më 6 korrik u ndërpre dy herë radhazi. Ai nuk e ka propozuar kandidatin për kryeparlamentar, siç kërkohet me Kushtetutë, pasi e konsideron të padobishme që të zgjidhet kryeparlamentari dhe nënkryetarët pa një marrëveshje paraprake për zgjedhjen e Presidentit.
Sipas një aktgjykimi të Gjykatës Kushtetuese, të premtën në mesnatë ka përfunduar afati për konstituimin e Kuvendit. Megjithatë, kryesuesi i seancës, Avni Dehari, deputeti më i vjetër i Kuvendit që vjen nga LVV-ja, e caktoi për të shtunën vazhdimin e seancës konstituive, e cila u ndërpre nga ai në po të njëjtën mënyrë si ditën kur ajo nisi.
