Policia e Kosovës ka sekuestruar disa armë zjarri dhe gëzhoja pas dyshimeve se gjatë një ahengu familjar në fshatin Lladrovc të Malishevës janë përdorur armë.
Rasti ka ndodhur dje, tha Policia, e cila njoftoi se veprimet operative dhe hetimore i ndërmorën pas pranimit të informacioneve dhe ngritjes së dyshimit të arsyeshëm.
“Stacioni Policor në Malishevë, bazuar në informacionet e pranuara dhe mbi dyshimin e arsyeshëm se gjatë një ahengu familjar më datë 09.08.2026 në fshatin Lladrovc-Malishevë janë përdorur armë zjarri, në koordinim dhe konsultim me prokurorin kompetent ka ndërmarrë veprime policore, operative dhe hetimore. Si rezultat, sot është realizuar kontroll në vendbanimin e personave të dyshuar”, thuhet në njoftim.
Gjatë kontrollit në oborrin ku ishte organizuar ahengu, Policia tha se “janë gjetur dhe sekuestruar 4 gëzhoja, si dëshmi materiale për rastin”.
“Ndërkaq, në automjetet e parkuara në afërsi të vendit ku është organizuar ahengu, pronë e të dyshuarve, janë gjetur dhe sekuestruar: një armë e gjatë automatike e tipit AK-47 me një karikator, një armë e gjatë gjysmë automatike, si dhe një pistoletë me gaz me një karikator dhe 4 fishekë. Të gjitha këto janë sekuestruar si dëshmi materiale për rastin”, thuhet në njoftim.
Në lidhje me rastin, Policia tha se “në cilësinë e të dyshuarve janë intervistuar katër persona meshkuj të moshës madhore, nën dyshimin se të njëjtit kanë përdorur armët e sekuestruara”.
“Në konsultim me prokurorin e shtetit, është iniciuar rast “Mbajtja në pronësi, kontroll ose posedim të paautorizuar të armëve” dhe “Përdorimi i armës apo i mjetit të rrezikshëm”, ndërsa rasti do të trajtohet më tej në procedurë të rregullt”, thuhet në njoftimin e Policisë.
