Bisedimet tregtare mes Kanadasë dhe Shteteve të Bashkuara kanë dështuar në momentet e fundit, duke rindezur tensionet tregtare mes dy vendeve. Otava ka paralajmëruar kundërpërgjigje të menjëhershme ndaj tarifave amerikane.
Negociatat mes Kanadasë dhe SHBA-së u ndërprenë të premten në mbrëmje, pavarësisht sinjaleve optimiste gjatë ditëve të fundit se dy vendet ishin pranë një marrëveshjeje për të shmangur tarifat amerikane prej 50 për qind ndaj një pjese të mallrave kanadeze.
Kryeministri kanadez Mark Carney njoftoi pezullimin e negociatave dhe tha se Kanadaja do të përgjigjet duke vendosur tarifa në të njëjtën masë.
“Si rezultat, sonte, kam vendosur të pezulloj negociatat tregtare me SHBA-në dhe u kam udhëzuar negociatorëve të Kanadasë të kthehen në Otava. Kanadaja do t’i barazojë këto tarifa dollar për dollar për të mbrojtur punëtorët dhe bizneset tona”, deklaroi Carney.
Nga ana amerikane, përfaqësuesi i Tregtisë së SHBA-së, Jamieson Greer, akuzoi Kanadanë se kishte refuzuar të finalizonte marrëveshjen mbi bazën e kushteve që, sipas Uashingtonit, ishin dakorduar më herët gjatë javës.
Greer tha se SHBA-ja i kishte ofruar Kanadasë trajtimin më të favorshëm që i jepet një eksportuesi të madh në tregun amerikan, por shtoi se kërkesat e reja dhe ndryshimet në angazhimet e Otavës kishin prishur kompromisin e arritur gjatë negociatave.
Tarifat 50 për qind hyjnë në fuqi
Pas dështimit të bisedimeve, kanë hyrë në fuqi tarifat amerikane prej 50 për qind për mallrat kanadeze me vlerë rreth 20 miliardë dollarë.
Presidenti amerikan Donald Trump kishte pezulluar përkohësisht zbatimin e këtyre tarifave gjatë javës, pasi kishte deklaruar se Uashingtoni dhe Otava ishin pranë arritjes së një marrëveshjeje të re tregtare.
Megjithatë, mungesa e një marrëveshjeje ka rikthyer përplasjen tregtare mes dy vendeve fqinje, ndërsa vendimi i Kanadasë për të reaguar “dollar për dollar” rrit rrezikun e një përshkallëzimi të mëtejshëm të konfliktit tarifor.
Zhvillimet e fundit pritet të kenë ndikim jo vetëm në marrëdhëniet ekonomike SHBA–Kanada, por edhe në bizneset dhe konsumatorët në të dyja vendet.
