Ministria e Infrastrukturës dhe Transportit ka njoftuar se të martën do të ketë kufizime të përkohshme në qarkullimin e automjeteve të transportit të mallrave me masë totale mbi 20 tonë.
Sipas njoftimit të ministrisë, kufizimi do të zbatohet në autostrada nga ora 11:00 deri në 17:30, për shkak të temperaturave të larta, të cilat parashikohet të arrijnë në 32 gradë Celsius ose më shumë.
Ndërkohë, në rrugët nacionale, rajonale dhe lidhëse qarkullimi i automjeteve mbi 20 tonë do të lejohet pa kufizime.
Nga kjo masë përjashtohen automjetet e:
- organeve të rendit dhe sigurisë publike;
- shërbimeve emergjente;
- institucioneve shëndetësore.
Ministria u ka bërë thirrje operatorëve ekonomikë dhe drejtuesve të automjeteve të transportit të mallrave që ta respektojnë kufizimin dhe ta planifikojnë qarkullimin në përputhje me orarin e përcaktuar.
Masa synon të kontribuojë në ruajtjen e sigurisë në komunikacion dhe mbrojtjen e infrastrukturës rrugore gjatë temperaturave të larta.
