UD presidentja Albulena Haxhiu, ka reaguar pas vrasjes së një gruaje 80-vjeçare në Prizren, duke kërkuar hetim të plotë dhe të shpejtë nga organet e drejtësisë.
Haxhiu tha se rasti nuk duhet të trajtohet si një ngjarje e izoluar, duke e lidhur atë me një tjetër vrasje të një gruaje të raportuar vetëm dy ditë më parë.
“Më tronditi lajmi për vrasjen e një gruaje 80-vjeçare në Prizren. Vetëm dy ditë më parë, një tjetër grua u vra, ndaj këto nuk mund të trajtohen si raste të izoluara. Mjaft më me vrasjen dhe dhunën ndaj grave!”, shkroi Haxhiu.
Ajo kërkoi që institucionet e drejtësisë të zhvillojnë hetime të plota dhe që personat përgjegjës, nëse shpallen fajtorë, të marrin dënimin më të rëndë të paraparë me ligj.
Sipas saj, krahas zbardhjes së rasteve të vrasjeve, institucionet duhet të fokusohen veçanërisht në parandalimin e dhunës ndaj grave, përpara se ajo të përshkallëzohet në pasoja fatale.
“Çdo rast duhet të zbardhet deri në fund, por po aq e rëndësishme është që dhuna të njihet dhe të ndalet para se të përfundojë në vrasje”, u shpreh ajo.
Haxhiu u bëri thirrje institucioneve përgjegjëse që të ndërmarrin masa urgjente dhe konkrete për mbrojtjen e grave dhe parandalimin e rasteve të dhunës.
Në fund, ajo i shprehu ngushëllime familjes së viktimës.
