Qeveria në detyrë e Republikës së Kosovës ka zhvilluar mbrëmë një mbledhje elektronike, në të cilën ka miratuar një sërë vendimesh, përfshirë transferimin e mbi 5.6 milionë eurove për nevoja të institucioneve publike.
Në mesin e vendimeve të miratuara është kërkesa e Shërbimit Spitalor, Klinik dhe Universitar të Kosovës (SHSKUK) për transferimin e 4,333,900 eurove, mjete të destinuara për furnizimin me barna nga Lista e Barnave Esenciale.
Po ashtu, është miratuar kërkesa e Ministrisë së Punëve të Brendshme për transferimin e 1 milion eurove, me qëllim të mbulimit të obligimeve që lidhen me shpenzimet operative.
Qeveria ka miratuar edhe kërkesën e Komunës së Podujevës për transferimin e 300 mijë eurove, të destinuara për mbulimin e obligimeve kontraktuale.
Në total, këto tri transferime arrijnë në 5,633,900 euro.
Në mbledhjen elektronike është miratuar edhe vendimi për caktimin e lartësisë së kompensimit mujor për anëtarët e Bordit të Drejtorëve të ndërmarrjes publike qendrore “Korporata e Ruajtjes së Energjisë – KRE (Energy Storage Corporation – ESCorp)” Sh.A.
Ndërkohë, Qeveria ka miratuar vendimin për dhënien në shfrytëzim të një hapësire prej 999 metrash katrorë, në parcelën kadastrale P-9012-0, në pronësi të Agjencisë Pyjore të Kosovës – Ndërmarrja e Pyjeve në Prizren, për nevoja të Ministrisë së Drejtësisë.
Në fund, Qeveria ka miratuar vendimin për nominimin e tre përfaqësuesve të saj në Këshillin Konsultativ për Komunitete.
Vendimet janë marrë në një kohë kur Qeveria e Kosovës vazhdon të funksionojë në detyrë, ndërsa vendi mbetet në pritje të zhvillimeve politike dhe institucionale lidhur me konstituimin e institucioneve të reja.
