Kryeministri në detyrë i Kosovës, Albin Kurti, ka pritur sot në takim lamtumirës ambasadorin e Francës në Kosovë, Olivier Guérot, me rastin e përfundimit të mandatit të tij.
Kurti e ka falënderuar ambasadorin francez për shërbimin dhe kontributin e tij në forcimin e marrëdhënieve ndërmjet Kosovës dhe Francës.
Sipas Kurtit, bashkëpunimi mes dy vendeve është thelluar gjatë këtij viti, veçanërisht pas takimit dhe drekës së punës me presidentin francez Emmanuel Macron në Pallatin Élysée në mars, si dhe vizitës së ministrit të deleguar për Evropën, Benjamin Haddad, në Kosovë në korrik.
Këto zhvillime, sipas kryeministrit, kanë rezultuar me pesë marrëveshje dhe instrumente bashkëpunimi, që përfshijnë drejtësinë, arsimin, frankofoninë, partneritetin financiar dhe institucional për organizimin e Lojërave Mesdhetare Prishtina 2030.
“Këto rezultate përbëjnë një bazë të rëndësishme për thellimin e mëtejmë të marrëdhënieve ndërmjet dy vendeve tona dhe për zgjerimin e bashkëpunimit në fusha me interes të përbashkët”, ka shkruar Kurti.
Ai ka theksuar se Franca mbetet një aleate dhe partnere e rëndësishme e Kosovës, duke vlerësuar mbështetjen franceze për rrugën evropiane dhe integrimin euroatlantik të vendit.
Në fund të takimit, Kurti i ka uruar ambasadorit Guérot sukses në angazhimet e ardhshme dhe e ka ftuar atë që të rikthehet në Kosovë.
