MIT vendos kufizim të përkohshëm në autoudhë nga ora 11:00 deri në 17:30, për shkak të temperaturave të larta.
Ministria e Infrastrukturës dhe Transportit ka njoftuar se të hënën, më 31 gusht, do të zbatohet kufizim i përkohshëm i qarkullimit për automjetet e transportit të mallrave me peshë mbi 20 tonë.
Sipas njoftimit të ministrisë, kufizimi do të vlejë vetëm në autoudhë, nga ora 11:00 deri në 17:30.
Vendimi është marrë për shkak të temperaturave të larta, pasi parashikohet që temperaturat të arrijnë në 32°C ose më shumë, kusht ky për aktivizimin e kufizimit.
Në rrugët nacionale dhe rajonale nuk ka kufizime
MIT ka bërë të ditur se në rrugët nacionale, rajonale dhe lidhëse qarkullimi i automjeteve të transportit të mallrave do të lejohet pa kufizime.
Nga masa përjashtohen automjetet e:
- organeve të rendit dhe sigurisë publike;
- shërbimeve emergjente;
- institucioneve shëndetësore.
Ministria u ka bërë thirrje operatorëve të transportit dhe ngasësve që ta respektojnë kufizimin dhe ta planifikojnë qarkullimin në përputhje me orarin e përcaktuar.
Kufizimi do të jetë në fuqi vetëm gjatë intervalit 11:00–17:30 në autoudhë.
