Kryeministri në detyrë i Kosovës, Albin Kurti, së bashku me ministrin në detyrë të Financave, Hekuran Murati, kanë vizituar të premten Doganën e Kosovës, e cila ditë më parë shënoi 27-vjetorin e themelimit.
Gjatë vizitës, Kurti dhe Murati u informuan për punën dhe rezultatet e Doganës së Kosovës, me fokus në rritjen e të hyrave, luftimin e ekonomisë joformale, lehtësimin e tregtisë dhe modernizimin e administrimit doganor.
1.347 miliardë euro të hyra
Sipas të dhënave të prezantuara gjatë vizitës, Dogana e Kosovës ka mbledhur deri tani gjatë këtij viti 1 miliard e 347 milionë euro të hyra, që përbën një rritje prej 6 për qind krahasuar me të njëjtën periudhë të vitit paraprak.
Krahas rritjes së të hyrave, janë ndërmarrë edhe reforma që synojnë lehtësimin e veprimtarisë së bizneseve dhe përshpejtimin e procedurave doganore.
Në këtë kuadër përmendet përmbyllja e shtetëzimit të terminaleve doganore, si dhe zbatimi i deklarimit të mallrave para arritjes.
Sipas të dhënave të prezantuara, kjo masë ka ndikuar në uljen e kohës së procesimit të mallrave me rreth 70 për qind.
Teknologjia në luftën kundër kontrabandës
Dogana e Kosovës ka forcuar gjithashtu kontrollet kufitare dhe përdorimin e teknologjisë për identifikimin e aktiviteteve të paligjshme.
Një prej zhvillimeve të përmendura është funksionalizimi i skanerit në Merdarë, i cili ka rritur kapacitetet për kontrollin dhe identifikimin e rasteve të dyshuara për kontrabandë dhe aktivitete të tjera të paligjshme.
Projekte të reja për modernizimin e Doganës
Në kuadër të modernizimit të administrimit doganor, janë duke u avancuar edhe disa projekte strategjike.
Ndër to përfshihen Dritarja e Vetme Kombëtare, Tranziti i Përbashkët, automatizimi i mëtejshëm i proceseve dhe forcimi i kapaciteteve teknologjike të Doganës së Kosovës.
Qëllimi i këtyre projekteve është rritja e efikasitetit të administratës doganore, lehtësimi i tregtisë dhe përmirësimi i shërbimeve për bizneset.
Mirënjohje për zyrtarët doganorë
Me rastin e 27-vjetorit të themelimit të Doganës së Kosovës, Kurti dhe Murati shprehën mirënjohje për zyrtarët doganorë për punën dhe përkushtimin e tyre në shërbim të qytetarëve, ekonomisë dhe Republikës së Kosovës.
Drejtuesit e institucioneve vlerësuan rolin e Doganës në mbledhjen e të hyrave, mbrojtjen e kufijve ekonomikë dhe luftimin e ekonomisë joformale.
