Deputetja e LDK-së, Janina Ymeri, ka deklaruar se 95 për qind e energjisë elektrike tepricë nga KEK-u është shitur përmes Bursës Shqiptare të Energjisë Elektrike (ALPEX) gjatë muajve korrik dhe gusht. Sipas saj, vlera e energjisë së tregtuar ka arritur në 10.2 milionë euro.
Ymeri ka thënë se ky zhvillim tregon se, kur ka kërkesë për llogaridhënie dhe presion publik, mënyra e tregtimit të energjisë mund të ndryshojë.
Ajo ka kritikuar praktikat e tregtimit të mbyllur të energjisë dhe tenderët publikë me procedura negociuese, duke kërkuar që ato të ndalen kur nuk ekziston një situatë urgjente.
Ymeri: Tregtimi “1 me 1” duhet të ndalet
Përmes një deklarate, deputetja e LDK-së ka kërkuar më shumë transparencë në shitjen e energjisë elektrike nga KEK-u.
“95% e rrymës tepricë nga KEK-u u shit nëpërmjet Bursës ALPEX gjatë korrikut dhe gushtit. 10.2 milionë euro. E shihni? Kur ka kërkesë për llogaridhënie dhe presion nga të gjithë, gjërat ndryshojnë.”
Ymeri ka theksuar se tregtimi i mbyllur i energjisë, i njohur si “1 me 1”, si dhe tenderët jo publikë dhe procedurat me negociata pa arsye urgjente, nuk duhet të përdoren më.
“Tregtimi i mbyllur ‘1 me 1’ i rrymës dhe tenderët jo publikë e me negociata pa urgjencë duhet të ndalen një herë e mirë. Kjo as që duhet të diskutohet”, ka deklaruar Ymeri.
Deklarata e saj vjen në kuadër të debatit për mënyrën e shitjes së energjisë së tepërt të prodhuar nga KEK-u dhe nevojën për transparencë e llogaridhënie në këto transaksione.