Familjet në Gjermani do të përfitojnë më shumë nga Kindergeld në dy vitet e ardhshme. Pagesa mujore për fëmijët do të rritet nga 259 euro aktualisht në 267 euro në vitin 2027, ndërsa në vitin 2028 pritet të arrijë në 272 euro për fëmijë në muaj.
Rritja e parë do të hyjë në fuqi në janar 2027. Kjo do të thotë 8 euro më shumë për fëmijë në muaj, ose 96 euro më shumë në vit.
Për një familje me dy fëmijë, kjo nënkupton 192 euro më shumë në vit krahasuar me shumën aktuale. Për tre fëmijë, shtesa vjetore do të jetë 288 euro.
Në vitin 2028, pagesa pritet të rritet edhe me 5 euro të tjera, duke arritur në 272 euro për fëmijë në muaj. Krahasuar me shumën aktuale prej 259 eurosh, bëhet fjalë për një rritje prej 13 eurosh në muaj, ose 156 euro në vit për çdo fëmijë.
Sa do të marrë një familje me dy fëmijë?
Me dy fëmijë, familja do të marrë në vitin 2028 gjithsej:
- 544 euro në muaj
- 6,528 euro në vit
Me shumën aktuale prej 259 eurosh për fëmijë, një familje me dy fëmijë merr 6,216 euro në vit.
Kështu, diferenca në vitin 2028 do të jetë 312 euro më shumë në vit.
Për familjet me tre fëmijë, pagesa do të arrijë në 816 euro në muaj, ose 9,792 euro në vit. Kjo përfaqëson 468 euro më shumë në vit krahasuar me shumën aktuale.
Për katër fëmijë, shtesa vjetore krahasuar me nivelin aktual do të arrijë në 624 euro.
Edhe lehtësimi tatimor për fëmijët rritet
Rritja e Kindergeld është pjesë e një pakete më të gjerë ndryshimesh në sistemin tatimor gjerman, ku parashikohet edhe përshtatja e Kinderfreibetrag, përkatësisht lehtësimit tatimor për fëmijët.
Kindergeld dhe Kinderfreibetrag nuk përfitohen të dyja në mënyrë të plotë njëkohësisht. Gjatë deklarimit vjetor të tatimeve, Finanzamt kontrollon automatikisht se cila zgjidhje është më e favorshme për familjen përmes të ashtuquajturit Günstigerprüfung.
Për shumicën e familjeve, megjithatë, Kindergeld mbetet përfitimi më i dukshëm, pasi pagesa mujore kalon drejtpërdrejt në të ardhurat e familjes.
Nëse një familje tashmë ka të drejtë për Kindergeld, rritja bëhet në kuadër të pagesës së përfitimit dhe zakonisht nuk ka nevojë të bëhet një aplikim i ri vetëm për shkak të rritjes së shumës.
Kështu, nga viti 2027 familjet do të marrin 267 euro për fëmijë në muaj, ndërsa nga viti 2028 shuma pritet të arrijë në 272 euro.
