Platforma “Liria ka emër” ka hapur të hënën në Prishtinë konferencën kombëtare “Lufta për UÇK-në”, në prag të shpalljes së verdiktit final nga Dhomat e Specializuara në Hagë në procesin gjyqësor ndaj Hashim Thaçit, Kadri Veselit, Jakup Krasniqit dhe Rexhep Selimit.
Në hapje të konferencës, përfaqësuesja e platformës, Eliza Hoxha, tha se procesi gjyqësor në Hagë ka qenë në qendër të vëmendjes publike në Kosovë për gjashtë vjet.
“Kjo konferencë vjen si moment për ta nisur një dialog të brendshëm për vlerat tona të vërteta, për historinë tonë, për pikat tona të përbashkëta edhe nëse nuk pajtohemi, por ato duhet të jenë aty për t’i vlerësuar dhe adresuar”, tha Hoxha.
Konferenca është organizuar përmes tri paneleve, ku po diskutohet për ndikimin e procesit në Hagë në historinë e Kosovës, kujtesën kolektive dhe narrativën publike e institucionale për luftën çlirimtare të UÇK-së.
Në panelin e parë, me temën “Konteksti i ri i krijuar nga Dhomat e Specializuara”, marrin pjesë Enver Hasani, Ylber Hysa dhe Enver Hoxhaj.
Ndërkaq, në panelin e dytë të konferencës, Visar Ymeri, Zana Hoxha dhe Dritan Dragusha diskutojnë lidhur me narrativën publike dhe institucionale për luftën çlirimtare.
Paneli i dytë moderohet nga Faton Abdullahu.
Konferenca “Lufta për UÇK-në” po mbahet në një moment të ndjeshëm për opinionin publik në Kosovë, pak para shpalljes së verdiktit final në procesin gjyqësor në Hagë ndaj ish-drejtuesve të Ushtrisë Çlirimtare të Kosovës.
