Ka ndërruar jetë Flora Brovina, mjeke, poete, humaniste, aktiviste për të drejtat e njeriut, ish-e burgosur politike, veterane e luftës së UÇK-së, deputete dhe një nga nënshkrueset e Deklaratës së Pavarësisë së Kosovës.
Lajmin për vdekjen e saj e kanë konfirmuar familjarët, ndërsa njoftimi është bërë publik edhe nga djali i saj, Ylli Begu.
Në njoftimin e familjes thuhet se Brovina la pas një jetë të përkushtuar ndaj familjes, njerëzve dhe Kosovës.
“Si mjeke u shërbeu njerëzve me përkushtim e dhembshuri; si poete na la fjalën dhe shpirtin e saj; ndërsa me veprën, qëndresën dhe humanizmin e saj la gjurmë të pashlyeshme në historinë e Kosovës dhe të shqiptarisë”, thuhet në njoftimin e familjes.
Familjarët e kanë kujtuar Brovinën jo vetëm për kontributin e saj publik, por edhe për rolin e saj brenda familjes, si nënë, gjyshe dhe motër.
“Largimi i saj lë një zbrazëti të madhe në familjen tonë, por kujtimi, dashuria dhe vepra e saj do të mbeten përherë mes nesh”, thuhet më tej në njoftim.
Familja ka bërë të ditur se për ceremoninë e varrimit dhe pritjen për ngushëllime do të njoftojë me kohë.
