Shqiptarët në diasporë kanë paralajmëruar disa tubime protestuese në Gjermani dhe Zvicër, pas vendimit të Dhomave të Specializuara të Kosovës në Hagë ndaj ish-krerëve të Ushtrisë Çlirimtare të Kosovës.
Sipas njoftimeve të publikuara nga organizatorët, të shtunën, më 19 shtator, një protestë do të mbahet në Köln Hbf, duke filluar nga ora 20:00.
Protesta është paralajmëruar me moton “Jo në emrin tim!”, ndërsa organizatorët u kanë bërë thirrje shqiptarëve në Gjermani që t’i bashkohen tubimit.
Në materialet promovuese të protestës në Këln thuhet se tubimi zhvillohet kundër vendimit të Gjykatës Speciale, ndërsa pjesëmarrësit janë ftuar që qëndrimin e tyre ta shprehin në mënyrë paqësore.
Një tjetër tubim është paralajmëruar në Cyrih, po më 19 shtator, në Helvetiaplatz, duke filluar nga ora 15:00.
Sipas njoftimit të organizatorëve, tubimi në Cyrih organizohet nga një grup të rinjsh shqiptarë në Zvicër dhe synon të shprehë kundërshtimin ndaj vendimit për ish-krerët e UÇK-së.
Ndërkohë, një protestë është paralajmëruar edhe në Shtutgart, në Kronprinzplatz, më 19 shtator, nga ora 19:00.
Organizatorët kanë bërë thirrje për pjesëmarrje në tubim dhe kanë kërkuar që pjesëmarrësit të marrin me vete flamuj kombëtarë dhe emblema të UÇK-së, si dhe të veshin ngjyrat kuqezi.
