Instituti Kombëtar i Shëndetësisë Publike të Kosovës (IKShPK) ka bërë thirrje për vaksinimin e fëmijëve, duke e cilësuar vaksinimin si masën më të rëndësishme për mbrojtjen e shëndetit të fëmijëve dhe komunitetit.
Sipas të dhënave të publikuara nga IKShPK, gjatë periudhës 16 prill – 27 shtator 2026 janë konfirmuar gjithsej 180 raste me fruth, ndërsa 8 raste janë regjistruar vetëm gjatë javës së fundit.
Instituti thekson se më shumë se 95 për qind e rasteve të konfirmuara me fruth u përkasin personave të pavaksinuar me vaksinën MMR.
Intensifikohet vaksinimi i vonuar
Përveç vaksinimit të rregullt sipas kalendarit kombëtar, IKShPK ka intensifikuar edhe vaksinimin e vonuar, i njohur si “catch-up”, për fëmijët që për arsye të ndryshme e kanë shtyrë vaksinimin.
Sipas Institutit, gjatë këtij viti janë vaksinuar mbi 3,176 fëmijë të grupmoshës 2–5 vjeç, si pjesë e kësaj fushate.
IKShPK ka vlerësuar kontributin e prindërve, profesionistëve shëndetësorë, institucioneve dhe qytetarëve në rritjen e shkallës së vaksinimit.
“Çdo fëmijë i vaksinuar është një jetë më shumë e mbrojtur dhe një hap më afër ndërprerjes definitive të përhapjes së fruthit”, thuhet në komunikatën e Institutit.
Në fund, IKShPK ka përcjellë mesazhin: “Vaksinimi i rregullt + catch-up = më shumë fëmijë të mbrojtur!”
