Presidenti amerikan Donald Trump po e shqyrton drejtorin e Inteligjencës Kombëtare, Jay Clayton, për postin e të ashtuquajturit “car i inteligjencës artificiale”, në një kohë kur në Uashington po shtohen diskutimet për mbikëqyrjen dhe sigurinë e teknologjive të avancuara të IA-së.
Gjatë një takimi me drejtues të kompanive të teknologjisë, Trump tha se e ka një person në mendje për këtë pozitë. I pyetur nëse bëhet fjalë për Clayton, presidenti e përshkroi atë si “një njeri të mirë” dhe tha se ideja do të ishte e mirë, pa konfirmuar zyrtarisht emërimin.
Kush është Jay Clayton?
Clayton është drejtor i Inteligjencës Kombëtare të SHBA-së dhe këshilltari kryesor i presidentit për çështjet e inteligjencës. Në këtë rol, ai mbikëqyr komunitetin amerikan të inteligjencës, i cili përfshin 18 agjenci.
Gjatë seancës së konfirmimit të tij në korrik, Clayton tha se inteligjenca artificiale paraqet njëkohësisht mundësi dhe kërcënim, duke argumentuar se SHBA-ja duhet të angazhohet drejtpërdrejt në menaxhimin e saj.
Trump kërkon ta krijojë edhe “AI Force”
Detajet e sakta të postit të “carit të IA-së” ende nuk janë përcaktuar. Trump ka deklaruar më herët se dëshiron të krijojë një strukturë të re qeveritare të quajtur “AI Force”, të modeluar sipas Space Force.
Sipas Axios, Trump ka thënë se synon ta zgjedhë personin për këtë pozitë brenda tre ose katër ditësh.
Në fokus edhe rregullimi i inteligjencës artificiale
Takimi i së martës në Shtëpinë e Bardhë mblodhi Trumpin, kryetarin e Dhomës së Përfaqësuesve Mike Johnson dhe drejtues të kompanive kryesore të teknologjisë.
Në takim u diskutua mënyra se si mund të balancohet zhvillimi i shpejtë i IA-së me sigurinë, ndërsa kompanitë kryesore ranë dakord për standarde vullnetare të mbikëqyrjes dhe kontrollit të sistemeve të inteligjencës artificiale. Marrëveshja nuk është ligjërisht detyruese.
David Sacks, i cili më parë ka mbajtur postin e “carit të IA-së”, mori pjesë gjithashtu në takimin e së martës. Ai e la zyrtarisht këtë rol në mars, por vazhdon të ketë rol këshillues jashtë administratës.
