“Nuk mendova, doja vetëm të ndihmoja dhe të shpëtoja.” Ky është rrëfimi i Ajdin Limonit, 53-vjeçarit nga Kosova, i cili u përfshi në një aksident të rëndë në Wohlen të kantonit Aargau dhe bashkë me ndihmës të tjerë të parë arriti të nxjerrë katër të rinj nga një makinë që ishte përfshirë nga flakët.
Ngjarja ndodhi të mërkurën mbrëma, rreth orës 20:45, në Alte Bremgarterstrasse në Wohlen. Sipas Policisë Kantonale të Aargaut, një Fiat Punto doli nga rruga në një kthesë dhe u përplas frontalisht me një pemë. Menjëherë pas përplasjes, automjeti u përfshi plotësisht nga zjarri.
Katër personat që ndodheshin në veturë ishin shtetas italianë me banim në Zvicër: një vajzë 17-vjeçare dhe tre djem të moshës 17, 18 dhe 21 vjeç.
Kur Limoni kaloi pranë vendit të aksidentit, fillimisht mendoi se po digjej një kaçubë. Por më pas pa veturën e përfshirë nga flakët dhe njerëzit që ndodheshin brenda.
Në vendngjarje kishte edhe kalimtarë të tjerë, por sipas rrëfimit të Limonit për 20 Minuten, disa prej tyre po qëndronin vetëm duke parë.
“Çfarë po prisni? Ndihmojini!”, u ka thënë ai.
Më pas ai iu afrua automjetit dhe hapi derën me një çekiç. Brenda pa tre persona pa vetëdije, ndërsa një vajzë ishte ende e vetëdijshme.
“Ajo bërtiti: ‘Ndihmë, po vdes, më ndihmoni!’”, rrëfeu Limoni, duke thënë se zëri i saj është diçka që nuk do ta harrojë.
Sipas tij, flakët mbi pjesën e përparme të automjetit arrinin rreth tre metra lartësi.
Limoni u kërkoi personave të tjerë në vendngjarje që të largonin menjëherë të plagosurit nga automjeti dhe kërkoi një thikë për të prerë rripat e sigurimit me të cilët pasagjerët ishin bllokuar.
“Nuk mendova, doja vetëm të ndihmoja dhe të shpëtoja”, tha 53-vjeçari.
Gjatë ndërhyrjes, ai pësoi djegie në duar dhe në ballë dhe u trajtua nga ekipet mjekësore. Sipas rrëfimit të tij, plagët nuk ishin të rrezikshme dhe më vonë u dërgua në shtëpi.
“Nuk është një ndjenjë e mirë”, tha ai, duke folur për kalimtarët që, sipas tij, nuk ndërhynë menjëherë.
Limoni u ka bërë thirrje njerëzve që, në raste të tilla, të mos qëndrojnë vetëm duke vëzhguar.
“Ndalo! Thjesht ndalo. Nuk ka rëndësi nëse ka trafik të bllokuar. Ju lutem kontrolloni nëse ka njerëz që kanë nevojë për ndihmën tuaj”, është mesazhi i tij.
Dy të rinj në gjendje të rëndë
Policia e Aargaut konfirmoi se disa ndihmës të parë arritën t’i nxjerrin të katër personat nga automjeti që po digjej. Të gjithë të rinjtë u dërguan në spitale.
Dy prej tyre pësuan lëndime shumë të rënda dhe u transportuan me dy helikopterë të shpëtimit në spitale në Basel dhe Cyrih, ndërsa dy të tjerët, me lëndime mesatare deri të rënda, u transportuan me ambulanca. Edhe disa nga ndihmësit e parë pësuan lëndime të lehta, kryesisht djegie.
Shkaku i saktë i aksidentit ende nuk është bërë i ditur. Sipas hetimeve fillestare, automjeti po lëvizte në drejtim të Bremgartenit kur, për arsye ende të paqarta, në një kthesë majtas vazhdoi drejt dhe u përplas me pemën. Policia po heton gjithashtu se kush ishte duke drejtuar automjetin në momentin e aksidentit.
Për Limonin, megjithatë, ajo mbrëmje mbetet mbi të gjitha momenti kur vendosi të veprojë.
“Kur mendoj se kam arritur të shpëtoj njerëz, ndihem relativisht mirë”, tha ai për mediat zvicerane.
