Ish-drejtori i Shërbimit Federal të Inteligjencës së Gjermanisë (BND), August Hanning, është arrestuar nën dyshimet për spiunazh, tradhti ndaj shtetit dhe sigurim të informacioneve të klasifikuara për një fuqi të huaj.
Sipas Prokurorisë Federale gjermane, Hanning, i cili drejtoi BND-në nga viti 1998 deri në vitin 2005 dhe më pas punoi si konsulent privat, dyshohet se ka përdorur informacione sekrete për të përgatitur një analizë për një shërbim të huaj inteligjence.
Autoritetet gjermane nuk kanë bërë të ditur se për cilin shtet apo shërbim të huaj bëhet fjalë.
Arrestohet edhe një ish-zyrtar i BND-së
Bashkë me Hanning është arrestuar edhe ish-zyrtari i BND-së, Manfred D., i cili akuzohet se i ka siguruar atij rreth 2 mijë dokumente të klasifikuara në këmbim të pagesës.
Sipas prokurorëve, Manfred D. ka shërbyer si shef kabineti i Hanning dhe ka vazhduar të punojë në BND deri në vitin 2026. Ai dyshohet se ka përdorur pozitën e tij për të siguruar qasje në materiale tepër konfidenciale, të cilat më pas ia ka dorëzuar Hanningut.
Shumë prej dokumenteve dyshohet se përmbanin informacione të klasifikuara vetëm për përdorim të brendshëm të BND-së.
Prokuroria pretendon se Hanning, në një rast, ka përdorur informacione të klasifikuara për të hartuar një analizë për një oficer të një shërbimi të huaj inteligjence. Megjithatë, mbetet e paqartë nëse materiali ka përfunduar te personi për të cilin ishte përgatitur.
Dyshime për kontakte me një tjetër shërbim të huaj
Hanning akuzohet gjithashtu se për disa vite ka mbajtur kontakte të ngushta me një përfaqësues të një tjetër shërbimi të huaj inteligjence.
Sipas Prokurorisë, atij i janë përcjellë informacione politike, disa prej të cilave dyshohet se janë bazuar në materiale të siguruara nga Manfred D.
Autoritetet gjermane nuk kanë bërë publike identitetin e shërbimeve të huaja që dyshohet se kanë qenë të përfshira.
Arrestimet në dy lande gjermane
Sipas raportimeve të mediave gjermane, Hanning është arrestuar në banesën e tij në Nordwalde, pranë Münsterit, ndërsa Manfred D. është arrestuar në Bavari.
Hanning pritet të dalë para gjykatës të mërkurën, ndërsa Manfred D. është paraparë të paraqitet para gjykatës të martën.
Dokumentet sekrete u zbuluan gjatë një hetimi tjetër
Sipas raportimeve, dokumentet e klasifikuara që dyshohet se i kishte Hanning u zbuluan gjatë një hetimi tjetër që lidhet me Christina Block, trashëgimtare e zinxhirit gjerman të restoranteve “Block House”.
Prokuroria e Hamburgut e akuzon Block se ka organizuar rrëmbimin e dy fëmijëve të saj më të vegjël në vitin 2023, në kuadër të një mosmarrëveshjeje për kujdestarinë.
Hanning është përmendur edhe në lidhje me një tentativë të mëparshme për rrëmbimin e fëmijëve, akuzë të cilën ai e mohon.
Gjatë hetimeve, policia dyshohet se ka gjetur një pajisje elektronike për ruajtjen e të dhënave, ku ndodheshin informacione të ndjeshme, përfshirë dokumente të fundit të BND-së.
Nuk është rasti i parë i dyshimeve për spiunazh në BND
Shërbimi sekret gjerman është përballur edhe më herët me një rast të rëndë të dyshuar spiunazhi.
Në vitin 2023, një zyrtar i lartë i BND-së u akuzua për tradhti ndaj shtetit, pasi dyshohej se kishte kaluar sekrete shtetërore te Rusia.
Sipas Prokurorisë, Carsten L. dyshohet se kishte përcjellë informacione lidhur me luftën në Ukrainë dhe grupin mercenar Wagner, ndërsa pretendohet se kishte përfituar rreth 400 mijë euro.
Procesi gjyqësor ndaj tij është ende në vazhdim.
Të gjitha akuzat ndaj personave të arrestuar mbeten pjesë e procedurave hetimore dhe gjyqësore dhe nuk përbëjnë fajësi të provuar deri në një vendim përfundimtar të gjykatës.
