Ish-kryetari i Aleancës për Ardhmërinë e Kosovës, Ramush Haradinaj, ka kritikuar qasjen e kryeministrit Albin Kurti lidhur me Ligjin për Dhomat e Specializuara.
Haradinaj ka thënë se ligji është votuar nga 91 deputetë dhe se, sipas tij, nuk duhet të përdoret si mjet kushtëzimi apo për zhvillimin e pazareve politike.
“Loja me nervat e njerëzve me kushtëzimet e tij për këtë ligj. S’ka asgjë kombëtare, as morale e as njerëzore nga konferenca në konferencë. Është e pandershme me lënë në gjysmë”, ka deklaruar Haradinaj në një konferencë për media.
Ai ka thënë se të gjitha temat politike kanë rëndësinë e tyre, por ka kundërshtuar mënyrën se si po trajtohet kjo çështje.
“Të gjitha temat kanë rëndësi, por s’ka asnjë logjikë me bërë lojëra të tilla kështu. Ky ligj është i të gjithë neve dhe iu bëj thirrje të gjithëve: ejani në Kuvend ta kryejmë ligjin”, ka thënë ai.
Haradinaj ka paralajmëruar se çdo vonesë në përfundimin e procedurave parlamentare do të ishte e pafalshme, duke theksuar edhe numrin e deputetëve që e kanë votuar ligjin.
“Nëse humbim kohë, do të jetë e pafalshme, sepse është ligj që është votuar nga 91 deputetë. Kemi edhe tri orë, kthehuni në seancë. Është ligj i të gjithë neve”, është shprehur Haradinaj.
