Bashkimi Evropian ka shprehur shqetësim të thellë lidhur me ndryshimet dhe plotësimet e Ligjit për Dhomat e Specializuara të Kosovës, të miratuara nga Kuvendi të martën mbrëma.
Sipas një zëdhënësi të BE-së, ndryshimet duhet të jenë në përputhje me detyrimet ndërkombëtare të Kosovës dhe me zotimin për garantimin e pavarësisë së Dhomave të Specializuara.
“Ne i bëjmë thirrje Kosovës që t’u përmbahet detyrimeve të saj ndërkombëtare për të garantuar pavarësinë gjyqësore të Dhomave të Specializuara të Kosovës, si dhe zotimit për të siguruar llogaridhënie dhe për t’u dhënë drejtësi viktimave dhe familjeve të tyre nga të gjitha komunitetet në Kosovë”, deklaroi zëdhënësi i BE-së për Radion Evropa e Lirë.
BE-ja ka rikujtuar se e ka mbështetur vazhdimisht punën e Dhomave të Specializuara si institucion i pavarur gjyqësor dhe kërkon që mandati dhe pavarësia e tyre të respektohen plotësisht.
“Dhomat e Specializuara të Kosovës po vendosin drejtësi bazuar në parimin e përgjegjësisë penale individuale”, tha zëdhënësi.
Ndryshimet u miratuan para zgjedhjes së presidentes
Kuvendi i Kosovës i miratoi ndryshimet në Ligjin për Dhomat e Specializuara në lexim të dytë në orët e vona të 6 tetorit.
Pak më pas, në minutat e para të 7 tetorit, Kuvendi zgjodhi Justina Shiroka-Pulën Presidente të Republikës së Kosovës.
Miratimi i ndryshimeve ligjore ishte pjesë e marrëveshjes politike që i dha fund bllokadës institucionale dhe siguroi votat për zgjedhjen e presidentes së re.
Projektligji ishte iniciuar nga Partia Demokratike e Kosovës dhe është kundërshtuar nga mbështetësit e Dhomave të Specializuara, përfshirë edhe përmes protestave në Prishtinë.
BE-ja përshëndet zgjedhjen e presidentes
Pavarësisht shqetësimit për Ligjin për Specialen, BE-ja e ka përshëndetur daljen e Kosovës nga bllokada institucionale dhe zgjedhjen e presidentes së re.
Brukseli pret që stabiliteti i institucioneve t’i mundësojë Kosovës të rifillojë punën në reformat që lidhen me rrugën e saj evropiane.
Sipas BE-së, në mesin e prioriteteve janë reformat e lidhura me Planin e Rritjes dhe Reformave, zbatimi i mëtejshëm i Marrëveshjes së Stabilizim-Asociimit, si dhe përparimi në bashkëpunimin rajonal dhe integrimin gradual në Tregun e Vetëm të BE-së.
“Partneriteti ynë nënkupton jo vetëm interesa të përbashkëta, por edhe përgjegjësi të përbashkët”, theksoi zëdhënësi evropian.
Pse është e rëndësishme çështja e Speciales?
Dhomat e Specializuara kanë selinë në Hagë, por janë pjesë e sistemit gjyqësor të Kosovës. Ato u themeluan në kuadër të detyrimeve që Kosova mori përmes këmbimit të letrave të vitit 2014 me Bashkimin Evropian.
BE-ja ka mbështetur krijimin dhe funksionimin e tyre dhe vazhdimisht e ka lidhur respektimin e mandatit të Dhomave me sundimin e ligjit dhe rrugën evropiane të Kosovës.
Reagimi i fundit i Brukselit tregon se ndryshimet e miratuara nga Kuvendi do të jenë një çështje e rëndësishme në marrëdhëniet e ardhshme mes Kosovës dhe Bashkimit Evropian.
