Një 29-vjeçar ka mbetur i vrarë nga të shtënat me armë zjarri mbrëmjen e së dielës në fshatin Pogragjë të Gjilanit. Policia e Kosovës ka konfirmuar se i dyshuari është larguar nga vendi i ngjarjes dhe është vënë në kërkim policor. Sipas informacioneve fillestare, dyshohet se viktima është vrarë nga babai i tij.
Ngjarja tragjike ka ndodhur më 11 tetor 2026, rreth orës 19:30, kur Policia e Kosovës ka pranuar informacion për të shtëna me armë zjarri në Pogragjë.
Sipas burimeve të Sinjalit, viktima është B. A, i lindur në vitin 1997, ndërsa për vrasjen dyshohet babai i tij, R.Arifi.
Në njoftimin zyrtar, Policia ka bërë të ditur se pas marrjes së informatës, në vendin e ngjarjes kanë dalë njësitë përkatëse policore dhe Prokurori i Shtetit.
“Vdekjen e viktimës në vendin e ngjarjes e ka konstatuar ekipi mjekësor”, thuhet në njoftimin e Policisë.
I dyshuari është në kërkim policor
Sipas zëdhënësit të Policisë për rajonin e Gjilanit, Valon Osmani, personi i dyshuar është i njohur për organet e rendit dhe dyshohet se është larguar nga vendi i ngjarjes pas kryerjes së veprës.
“Policia e Kosovës, në koordinim me Prokurorin e Shtetit dhe njësitë përkatëse hetimore, është duke ndërmarrë të gjitha veprimet e nevojshme hetimore dhe operative për lokalizimin dhe arrestimin e të dyshuarit, si dhe për sqarimin e plotë të rrethanave të rastit”, ka deklaruar Osmani.
Sipas informacioneve fillestare të raportuara nga mediat, i dyshuari dyshohet se është larguar me një veturë të markës Suzuki.
Ndërkohë, Policia dhe Prokuroria po vazhdojnë hetimet për zbardhjen e plotë të rrethanave dhe motivit të mundshëm të vrasjes. Deri më tani, nuk janë bërë publike detaje të tjera zyrtare lidhur me motivin e ngjarjes.
