Kimberly Guilfoyle, ambasadorja amerikane në Athinë dhe ish-e fejuara e Donald Trump Jr., ka dhënë dorëheqjen pas presionit nga Shtëpia e Bardhë, në një kohë kur ndaj saj janë ngritur akuza për favore ndaj një kompanie greke, përdorim të avionëve privatë dhe kërkesë për 100 mijë dollarë nga një donator politik. Guilfoyle i ka mohuar akuzat, duke deklaruar se do të mbrojë emrin dhe reputacionin e saj.
Ambasadorja amerikane në Greqi, Kimberly Guilfoyle, është larguar nga detyra pas presionit të administratës së presidentit Donald Trump, pas publikimit të një serie raportimesh nga gazeta amerikane The Wall Street Journal, që ngrenë pikëpyetje mbi marrëdhëniet e saj me biznesmenë dhe donatorë politikë.
Sipas raportimeve, Shtëpia e Bardhë i kërkoi Guilfoyle të jepte dorëheqjen për shkak të akuzave për sjellje të papërshtatshme. Largimi i saj vjen pas zbulimeve që lidhen me fluturime private, marrëdhënie me përfaqësues të një grupi të madh grek të ndërtimit dhe energjisë, si dhe mesazhe ku ajo pretendohet se kërkonte 100 mijë dollarë nga një donator.
Guilfoyle i ka kundërshtuar akuzat dhe ka paralajmëruar se do të mbrojë reputacionin e saj.
Guilfoyle: Akuzat janë të rreme, mbetem mbështetëse e Trump
Në një deklaratë të publikuar në rrjetin social X, Guilfoyle konfirmoi largimin nga detyra, por mohoi pretendimet e ngritura ndaj saj.
“Akuzat ndaj meje janë të rreme dhe do të mbroj me vendosmëri emrin, reputacionin dhe integritetin tim”, deklaroi ajo.
Guilfoyle e cilësoi shërbimin ndaj Shteteve të Bashkuara si nderin më të madh të jetës së saj, ndërsa falënderoi presidentin Donald Trump dhe sekretarin amerikan të Shtetit, Marco Rubio.
Ajo gjithashtu rikonfirmoi mbështetjen për Trump dhe agjendën e tij politike “Amerika e Para”, duke theksuar se do të vazhdojë ta mbështesë presidentin edhe pas largimit nga posti diplomatik.
Sipas raportimit, Trump fillimisht ishte shprehur i befasuar nga lajmet për akuzat ndaj Guilfoyle, por më pas qëndrimi i administratës ndryshoi dhe kërkesa për dorëheqje u bë e drejtpërdrejtë.
Hetimi për lidhjet me një kompani greke
Një pjesë e rëndësishme e raportimeve të The Wall Street Journal lidhet me marrëdhëniet e Guilfoyle me kompaninë greke Aktor, e cila ka zgjeruar aktivitetin e saj edhe në sektorin e gazit të lëngshëm.
Sipas gazetës, ambasadorja ishte përfshirë në përpjekjet për të promovuar eksportet amerikane të gazit në vendet e Ballkanit, ndërkohë që në aktivitetet e saj zyrtare shfaqeshin edhe persona të lidhur me kompaninë greke.
Në raportime përmendet Alexandros Exarchou, drejtues i grupit Aktor, i cili pretendohet se e kishte transportuar Guilfoyle me avion privat drejt Bullgarisë.
Po ashtu, Christos Marafatsos, i cili kishte drejtuar grupin “Greek Voices for Trump” dhe ishte regjistruar si lobist i Aktor që nga nëntori i vitit 2025, përshkruhet si një person që shfaqej shpesh pranë ambasadores gjatë takimeve dhe aktiviteteve zyrtare.
Sipas artikullit, drejtues të një kompanie tjetër amerikane të gazit ishin ankuar se Guilfoyle kishte favorizuar disa aktorë ekonomikë në dëm të të tjerëve.
Raportimi përmend gjithashtu një darkë në ambasadë, më 18 mars, gjatë së cilës Guilfoyle pretendohet se kishte bërë komente për mundësinë e krijimit të krizave politike në vende të ndryshme, përfshirë Greqinë. Avokati i saj e ka kundërshtuar këtë version të ngjarjes.
Pretendimi për kërkesën prej 100 mijë dollarësh
Një nga episodet më të diskutueshme të raportuara nga gazeta amerikane lidhet me mesazhet që Guilfoyle pretendohet se i kishte dërguar Eric Deters, një donator politik nga Kentaki dhe mbështetës i Trump.
Sipas The Wall Street Journal, më 3 korrik 2025, pak ditë para seancës dëgjimore të konfirmimit të saj në Senat, Guilfoyle i kishte kërkuar Detersit 100 mijë dollarë, të cilat, sipas raportimit, do të transferoheshin drejtpërdrejt në kartën e saj American Express.
Në mesazhet e publikuara nga gazeta, ajo pretendohet se kishte këmbëngulur për pagesën dhe i kishte sugjeruar bashkëbiseduesit që të mos linte gjurmë me shkrim.
Deters, sipas raportimit, kishte kërkuar në këmbim ndihmë për disa çështje, përfshirë ekstradimin nga Pakistani të një kirurgu të akuzuar për ndërhyrje të panevojshme kirurgjikale, ndërhyrje në çështje tatimore dhe mundësinë për një intervistë me komentatorin Tucker Carlson.
Carlson, nga ana e tij, ka deklaruar se nuk e njihte Detersin dhe është shprehur i habitur nga pretendimi se për një intervistë në podcast ishte përmendur shuma prej një milion dollarësh.
Megjithatë, akuzat mbeten pjesë e raportimit mediatik dhe janë kundërshtuar nga pala e Guilfoyle.
Avokati i saj, Jesse Binnall, ka vënë në pikëpyetje autenticitetin e mesazheve. Sipas mbrojtjes, Deters ishte një klient që kishte detyrime të papaguara për aktivitete të mëparshme dhe Guilfoyle nuk e kishte vënë atë në kontakt me administratën amerikane.
Mbrojtja ka deklaruar gjithashtu se fluturimet private ishin autorizuar nga Departamenti i Shtetit.
Reagime shqetësuese në Uashington
Raportimet kanë shkaktuar reagime edhe në radhët e zyrtarëve republikanë.
Sekretari i Shtetit, Marco Rubio, i cili më parë e kishte vlerësuar Guilfoyle si një ambasadore të fortë, sipas artikullit, më pas u shpreh se nuk e dinte nëse akuzat ishin të vërteta.
Ndërkohë, zëvendëspresidenti JD Vance ka kritikuar personat që pretendohet se shesin mundësinë e kontakteve me zyrtarë të qeverisë. Edhe John Barrasso, një nga drejtuesit e republikanëve në Senat, i ka cilësuar raportimet si shqetësuese.
Presioni politik ndaj Guilfoyle u shtua pas publikimit të disa pjesëve të hetimit gazetaresk, përfshirë raportime për udhëtime me avionë privatë dhe marrëdhënie me biznesmenë grekë.
Nga prokurore dhe figurë televizive në ambasadore
Kimberly Guilfoyle ka lindur në San Francisko në vitin 1969. Ajo studioi drejtësi në Universitetin e San Franciskos dhe e nisi karrierën si prokurore, përpara se të bëhej figurë e njohur televizive në rrjetin Fox News.
Në jetën e saj personale, ajo ishte e martuar me Gavin Newsom, guvernatorin demokrat të Kalifornisë, dhe më pas me sipërmarrësin Eric Villency, me të cilin ka një djalë.
Më vonë, Guilfoyle pati një lidhje gjashtëvjeçare me Donald Trump Jr., djalin e madh të presidentit amerikan.
Në dhjetor të vitit 2024, Trump e emëroi ambasadore të SHBA-së në Greqi. Emërimi i saj u shoqërua me interes të veçantë mediatik, edhe për shkak të së kaluarës së saj politike dhe personale.
Guilfoyle kishte shkaktuar polemika edhe më herët, për shkak të komenteve të bëra në televizion në vitin 2015, gjatë krizës së borxhit grek, kur kishte krahasuar nevojën për disiplinë financiare në Greqi me edukimin e një qeni.
Dorëheqja e saj vjen në një moment kur raportimet për marrëdhëniet me biznesmenë dhe donatorë kanë shtuar presionin politik në Uashington. Megjithatë, Guilfoyle i mohon akuzat dhe ka bërë të ditur se do të vazhdojë betejën për të mbrojtur emrin e saj.
