Agjencia e Ushqimit dhe Veterinarisë (AUV) ka ndaluar hyrjen në Kosovë të 1,068 kilogramëve patatina “STIZA Potato Chips Paprika”, pasi analizat laboratorike kanë konstatuar nivel të akrilamidit mbi vlerat referente të përdorura gjatë kontrollit.
Sipas njoftimit të AUV-së, ngarkesa me numër LOT 909073 ishte importuar nga kompania BEST BT SH.P.K. në Prizren.
Pas rezultateve të analizave laboratorike, të evidentuara në raportin nr. 4397/2026, Inspektorati Fitosanitar Kufitar ka marrë vendim për ndalimin e hyrjes dhe kthimin e ngarkesës.
Me këtë masë, sipas AUV-së, është parandaluar vendosja e këtij produkti në tregun e Kosovës.
Çfarë është akrilamidi dhe pse paraqet shqetësim?
Akrilamidi është një substancë kimike që mund të formohet gjatë përpunimit të ushqimeve të pasura me niseshte në temperatura të larta, veçanërisht gjatë skuqjes dhe pjekjes.
Sipas Autoritetit Evropian për Sigurinë Ushqimore (EFSA), ekspozimi afatgjatë ndaj akrilamidit përmes ushqimit përbën shqetësim për shëndetin publik, për shkak të potencialit të tij kancerogjen.
AUV ka bërë të ditur se masa e ndërmarrë vlen për ngarkesën e identifikuar me LOT 909073, ndërsa kontrollet zyrtare do të vazhdojnë për të parandaluar hyrjen në treg të produkteve që nuk i përmbushin kërkesat e sigurisë ushqimore.
Agjencia u bën thirrje konsumatorëve të kenë kujdes dhe thekson se kontrollet synojnë mbrojtjen e shëndetit publik.
