Ministria e Arsimit dhe Shkencës (MASh) ka shfuqizuar vendimin e Këshillit Drejtues të Universitetit të Shkencave të Aplikuara në Ferizaj (UShAF), përmes të cilit Agron Bajraktari ishte zgjedhur rektor i këtij institucioni.
Sipas njoftimit të Ministrisë, vendimi është marrë pas konstatimit të shkeljeve ligjore në procedurën e zgjedhjes së rektorit, të evidentuara në një opinion të Zyrës Ligjore të MASh-së.
Ministria evidenton dy shkelje në procedurën e zgjedhjes
Në opinionin ligjor janë identifikuar dy shkelje kryesore.
E para lidhet me mosrespektimin e detyrimit ligjor për intervistimin e kandidatëve nga të gjithë anëtarët e Këshillit Drejtues.
Shkelja e dytë, sipas Ministrisë, ka të bëjë me zgjedhjen e rektorit për një mandat të tretë, në kundërshtim me dispozitat ligjore në fuqi.
MASh thekson se Këshilli Drejtues, pavarësisht kërkesave të vazhdueshme të Ministrisë, për muaj të tërë ka refuzuar ta shqyrtojë opinionin ligjor dhe të ndërmarrë veprime për adresimin e shkeljeve të konstatuara.
Këshillit Drejtues i jepen tri ditë për emërimin e ushtruesit të detyrës
Pas shfuqizimit të vendimit, Ministria i ka kërkuar Këshillit Drejtues që brenda tri ditëve të emërojë një ushtrues detyre të rektorit, me konsensusin e të gjithë anëtarëve.
Po ashtu, Këshilli është udhëzuar që të nisë menjëherë përgatitjet për shpalljen e konkursit të ri për zgjedhjen e rektorit.
Ministria ka vlerësuar se emërimi me konsensus i ushtruesit të detyrës do të ishte një hap i rëndësishëm drejt rikthimit të bashkëpunimit dhe funksionimit të rregullt institucional në universitet.
Në fund, MASh u ka bërë thirrje anëtarëve të Këshillit Drejtues, stafit akademik dhe administrativ që të kontribuojnë në tejkalimin e situatës, duke vendosur interesin e universitetit mbi interesat personale.
Ministria ka deklaruar se do të vazhdojë të angazhohet për respektimin e ligjshmërisë, autonomisë universitare dhe stabilitetit institucional në Universitetin e Shkencave të Aplikuara në Ferizaj.
