Demokratët në Shtetet e Bashkuara kanë shënuar një fitore të madhe në zgjedhjet e mesit të mandatit, duke siguruar kontrollin si të Dhomës së Përfaqësuesve, ashtu edhe të Senatit. Kështu parashikon CNN, në një rezultat që përbën një goditje të rëndësishme politike për presidentin Donald Trump dhe Partinë Republikane.
Sipas projeksioneve të CNN-it, demokratët kanë arritur të fitojnë edhe në disa shtete që në zgjedhjet presidenciale të vitit 2024 kishin votuar bindshëm për Trumpin. Mes tyre janë Karolina e Jugut, Teksasi, Ohajo, Kansas dhe Iowa.
Fitorja në këto shtete konsiderohet veçanërisht e rëndësishme, pasi demokratët kanë arritur të përmbysin gara që për dekada kanë qenë bastione të republikanëve. Në Teksas, James Talarico pritet të sigurojë një vend në Senat, ndërsa në Kansas, Adam Hamilton shënon një tjetër fitore të rëndësishme për demokratët.
Në Iowa, Josh Turek shpalli fitoren dhe deklaroi se rezultati përfaqëson një ndryshim historik për shtetin. Ndërkohë, demokratët kanë arritur fitore edhe në gara të rëndësishme në Wisconsin, Maine dhe shtete të tjera.
Pakënaqësia ndaj Trumpit ndikoi në rezultat
Sipas analizës së CNN-it, faktorët kryesorë që ndikuan në humbjen e republikanëve lidhen me inflacionin, tarifat tregtare të Trumpit, luftën në Iran, si dhe pakënaqësinë e votuesve ndaj politikave dhe sjelljes së presidentit.
Sondazhet e votuesve të CNN-it tregojnë se më shumë se gjashtë në dhjetë votues nuk e miratojnë punën e Trumpit si president. Ndërkaq, rreth dy të tretat e të anketuarve vlerësojnë se politikat e tij e kanë përkeqësuar gjendjen ekonomike.
Humbja e kontrollit të të dy dhomave të Kongresit është një zhvillim i rrallë në politikën amerikane. Sipas CNN-it, vetëm dy herë gjatë 50 viteve të fundit ka ndodhur që kontrolli i Dhomës së Përfaqësuesve dhe Senatit të ndryshojë në të njëjtin cikël zgjedhor.
Trump: Urime demokratëve, nuk e shoh si goditje ndaj meje
Presidenti Donald Trump ka deklaruar se do t’i pranojë rezultatet e zgjedhjeve, ndërsa ka minimizuar ndikimin politik të humbjes së republikanëve.
Në një intervistë për Fox News, ai tha se nuk e konsideron rezultatin si një goditje ndaj presidencës së tij dhe pretendoi se dy vitet e fundit kanë qenë ndër më të suksesshmet në historinë e presidencës amerikane.
“Urime demokratëve. Ata bënë një punë të mirë. Ata e kanë kërkuar këtë për 11 vjet dhe më në fund e arritën”, deklaroi Trump.
Ai gjithashtu kritikoi disa kandidatë republikanë që kishte mbështetur gjatë fushatës, duke i fajësuar se nuk arritën të mobilizonin mjaftueshëm votuesit dhe se disa prej tyre kishin vepruar kundër tij.
Demokratët fitojnë më shumë pushtet për të kufizuar Trumpin
Kontrolli i të dy dhomave të Kongresit u jep demokratëve mundësi më të mëdha për të mbikëqyrur administratën Trump, për të zhvilluar hetime parlamentare dhe për të thirrur zyrtarë të administratës për dëshmi.
Kontrolli i Senatit u mundëson gjithashtu demokratëve të bllokojnë ose të pengojnë emërimet e presidentit në poste të rëndësishme gjyqësore, përfshirë emërimet e mundshme në Gjykatën Supreme.
Megjithatë, demokratët do të përballen me kufizime në zbatimin e agjendës së tyre politike. Vetoja presidenciale dhe pragu prej 60 votash që kërkohet për miratimin e shumicës së legjislacionit në Senat mund ta vështirësojnë miratimin e ligjeve të reja.
Numërimi i votave në disa shtete ende vazhdon, ndërsa madhësia përfundimtare e shumicës demokrate në të dyja dhomat pritet të përcaktohet pas rezultateve zyrtare.
