Dhoma e Përfaqësuesve e SHBA-së ka bllokuar përpjekjen për të nisur procedurën e shkarkimit të sekretarit të Mbrojtjes, Pete Hegseth. Presidenti Donald Trump ka përshëndetur rezultatin e votimit dhe ka sulmuar kongresmenin republikan Thomas Massie, autorin e nismës.
Me 211 vota pro dhe 204 kundër, Dhoma e Përfaqësuesve miratoi mocionin për të bllokuar procedimin e rezolutës për shkarkimin e Hegseth përmes procedurës së fajësimit (impeachment).
Nisma ishte paraqitur nga republikani Thomas Massie, i cili po largohet nga Kongresi. Votimi u zhvillua pa surpriza, pasi shumica e republikanëve mbështetën qëndrimin e presidentit Trump.
Pas rezultatit, Trump reagoi në rrjetin e tij social Truth Social, duke përgëzuar republikanët për mbështetjen ndaj kreut të Pentagonit.
“Përpjekja e demokratëve dështoi. Çdo republikan, me përjashtim të Thomas Massie, një humbës i madh, votoi në mbështetje të Pete”, shkroi Trump.
Më herët, pas konferencës për shtyp të Hegseth, presidenti e kishte vlerësuar paraqitjen e tij me notën maksimale, duke e quajtur Massien “një dështak të vërtetë”.
Hegseth i cilësoi akuzat si sulme politike
Votimi u mbajt rreth dhjetë orë pas konferencës për shtyp të Hegseth, ku sekretari i Mbrojtjes hodhi poshtë akuzat e paraqitura në rezolutën për shkarkimin e tij.
Ai e cilësoi nismën si “farsë”, “sabotim” dhe “spektakël politik”, duke pretenduar se bëhej fjalë për një sulm politik ndaj tij dhe presidentit Trump.
Hegseth mbrojti operacionet ushtarake amerikane kundër Iranit, veprimet kundër karteleve të narkotrafikut dhe sulmet në Jemen, duke i cilësuar si operacione të ligjshme, të autorizuara nga komandanti i përgjithshëm dhe nga ai vetë.
Ai gjithashtu hodhi poshtë akuzat se forcat amerikane kishin shënjestruar civilë.
“Asnjëra prej këtyre akuzave nuk përbën një shkelje të rëndë apo një kundërvajtje që justifikon shkarkimin. Bëhet fjalë për mosmarrëveshje politike partiake”, deklaroi Hegseth.
Sekretari i Mbrojtjes rikonfirmoi gjithashtu besnikërinë ndaj Trumpit, ndërsa mbrojti vendimet dhe operacionet ushtarake të administratës.
Demokratët paralajmërojnë hetime të reja
Pavarësisht bllokimit të nismës, demokratët kanë paralajmëruar se do të vazhdojnë të kërkojnë hetime për veprimet e administratës.
Kongresmenia demokrate Alexandria Ocasio-Cortez deklaroi për CNN se mund të ketë nisma të tjera, duke theksuar se hetimet duhet të bazohen në prova.
“Të riparaqesim mocionet? Në këtë administratë ka kaq shumë persona që kanë kryer shkelje, sa është e vështirë të përcaktohet se nga duhet të fillojmë”, deklaroi ajo.
Sipas raportimit të mediave italiane, pozita e Hegseth mund të përballet me presion të ri në janar, kur Kongresi i ri të nisë punën dhe demokratët të kenë shumicën.
Nisma e fundit nuk arriti të kalojë fazën fillestare parlamentare, ndërsa debati për përgjegjësinë e kreut të Pentagonit pritet të vazhdojë.