Asambleja Kombëtare e Partisë Socialiste në Shqipëri ka nisur punimet me dyer të mbyllura në Gjirin e Lalzit, në një moment tensionesh brenda partisë. Kryeministri Edi Rama ka kërkuar t’u drejtohet fillimisht anëtarëve në një takim pa praninë e mediave, ndërsa kryebashkiaku i Tiranës, Erion Veliaj, i ka kërkuar dorëheqjen përmes një letre drejtuar anëtarëve të Asamblesë.
Mbledhja ka nisur me një mesazh të Ramës për anëtarët e Asamblesë, ndërsa më pas pritet pjesa publike e fjalimit të tij.
Në letrën drejtuar socialistëve, Veliaj ka kërkuar ndryshimin e modelit të drejtimit të Partisë Socialiste, duke argumentuar se reformimi i saj nuk mund të bëhet pa ndryshuar kryetarin që, sipas tij, e ka krijuar këtë model.
Ai e konsideron Ramën pengesën kryesore për reformimin e partisë dhe kërkon aktivizimin e mocionit të mosbesimit ndaj tij.
Zgjedhjet lokale të vitit 2027 në fokus
Një prej çështjeve kryesore të mbledhjes pritet të jetë përgatitja për zgjedhjet lokale të 9 majit 2027 dhe përcaktimi i formulës për zgjedhjen e kandidatëve për 46 bashki.
Në kampin socialist ende nuk ka vendime përfundimtare për kandidaturat, ndërsa disa emra kanë nisur të përmenden si alternativa të mundshme.
Për Bashkinë e Tiranës, deputeti Erion Braçe ka paralajmëruar se do të kërkojë një proces të brendshëm partiak për përcaktimin e kandidatit. Në diskutim është edhe emri i Ogerta Manastirliut, e cila ishte propozuar nga Rama për zgjedhjet e parakohshme të nëntorit 2025, që nuk u zhvilluan.
Ndërkohë, në garë mund të përfshihet edhe ministri aktual i Brendshëm, Ervin Demo, i cili më herët ka drejtuar Bashkinë e Beratit.
Mundësi ndryshimesh edhe në qeveri
Përveç garës për bashkitë, në Asamble pritet të diskutohen edhe lëvizjet e mundshme në kabinetin qeveritar.
Ministri Enea Karakaçi përmendet si një nga emrat që mund të kandidojë për Bashkinë e Shkodrës, ndërsa ministri i Bujqësisë dhe Zhvillimit Rural, Andis Salla, mund të jetë kandidat për Bashkinë e Elbasanit.
Salla ka drejtuar më herët Bashkinë e Cërrikut për një mandat e gjysmë. Me reformën e re territoriale, kjo bashki është përfshirë në njësinë e zgjeruar të Elbasanit.
Mundësia që disa ministra të largohen nga kabineti për të garuar në zgjedhjet lokale ka shtuar pritshmëritë për ndryshime në qeveri.
Mbledhja zhvillohet gjithashtu në një klimë pakënaqësish politike dhe protestash, përfshirë ato të tetorit, ndërsa Rama pritet të përcaktojë edhe rolin e drejtuesve politikë të qarqeve në fushatën e ardhshme.
Socialistët fikin telefonat gjatë mbledhjes
Një tjetër veçori e takimit është zhvillimi i punimeve me dyer të mbyllura dhe fakti se telefonat e anëtarëve të Asamblesë nuk janë të aksesueshëm.
Sipas raportimeve nga vendi i ngjarjes, ende nuk dihet nëse socialistëve u është kërkuar t’i fikin telefonat apo nëse është përdorur ndonjë pajisje për bllokimin e sinjalit.
Kjo është mbledhja e parë e Asamblesë Kombëtare të PS-së pas nëntë muajsh. Takimi i fundit ishte mbajtur më 21 mars.
