Ministri i Arsimit dhe Shkencës, Hajrulla Çeku, ka nisur në Prishtinë ciklin e konsultimeve me studentët për hartimin e Strategjisë së Arsimit 2035+, me synimin që përvojat, pikëpamjet dhe rekomandimet e tyre të përfshihen në përcaktimin e prioriteteve për zhvillimin e arsimit në Kosovë.
Në takimin e parë mori pjesë edhe kryetari i Parlamentit Studentor të Universitetit të Prishtinës, Flon Kastrati.
Gjatë bashkëbisedimit, ministri Çeku theksoi se përparimi i arsimit kërkon angazhimin e përbashkët të institucioneve dhe të gjithë shoqërisë, duke vlerësuar se përfshirja e studentëve është thelbësore për hartimin e një strategjie që pasqyron nevojat reale të arsimit të lartë dhe adreson sfidat e tij.
Ai i ftoi studentët që, përveç kërkesave dhe shqetësimeve për kushtet e studimit, të paraqesin ide dhe propozime konkrete për të ardhmen e universiteteve dhe përmirësimin e cilësisë së studimeve.
Cilësia e programeve dhe lidhja me tregun e punës
Një nga çështjet kryesore të diskutimit ishte cilësia dhe oferta e programeve universitare, përgatitja e të diplomuarve për jetën profesionale dhe përputhja e njohurive e shkathtësive të fituara gjatë studimeve me kërkesat e tregut të punës.
Sipas ministrit Çeku, studimet duhet t’u mundësojnë të rinjve të punësohen në profesionin e tyre, të arrijnë pavarësi ekonomike dhe të përmirësojnë mirëqenien.
Për të orientuar diskutimin, ai kërkoi nga studentët të ndajnë përvojat e tyre lidhur me përgatitjen që ofrojnë studimet për tregun e punës, qasjen në mjetet e nevojshme për mësim dhe mundësitë për hulumtim shkencor.
Po ashtu, studentët u ftuan të flasin për pengesat që hasin gjatë ndjekjes dhe përfundimit të studimeve, përvojën e përditshme në universitet dhe fakultet, si dhe mundësitë që kanë për të shprehur mendimet e tyre dhe për të pasur trajtim të barabartë.
Ministri kërkoi që shqetësimet dhe rekomandimet e studentëve të shërbejnë si bazë për përmirësimin e përvojës universitare dhe zhvillimin e arsimit të lartë.
Konsultimet në Prishtinë pasojnë takimet me mësimdhënësit, drejtuesit e universiteteve dhe prindërit. Sipas Ministrisë së Arsimit, bashkëbisedimet me studentët do të vazhdojnë në Gjilan dhe në rajonet e tjera të Kosovës.

