Grupi parlamentar i Aleancës për Ardhmërinë e Kosovës ka bërë homazhe në nder të heronjve Ilir Konushevci dhe Hazir Malaj, në 27-vjetorin e rënies së tyre. Në ceremoninë përkujtimore, pjesëmarrës ishin drejtues dhe anëtarë të AAK-së, përfshirë kryetarin e partisë, Ramush Haradinaj.
Duke vlerësuar lart kontributin e tyre në luftën për lirinë e Kosovës, Haradinaj tha se sakrifica e Konushevcit dhe Malajt do të kujtohet përjetë.
“Mund të them me të drejtë se Ilir Konushevci ishte nga themeluesit e Ushtrisë Çlirimtare të Kosovës. Një luftëtar i hershëm, bashkëluftëtar i heroit Zahir Pajaziti e shumë të tjerëve, Luanit e Shkëlzenit. Njëkohësisht, një koleg i mirë yni, mjaft i rëndësishëm në atë kohë,” u shpreh Haradinaj.
Ai gjithashtu përkujtoi me nderim dr. Hazir Malajn, duke e cilësuar si një bashkëkombës nga Tropoja, i cili iu bashkua radhëve të UÇK-së me përkushtim të lartë kombëtar dhe ra dëshmor krah për krah me Ilir Konushevcin.
“Do t’i nderojmë dhe përkujtojmë përjetë,” përfundoi Haradinaj.
Homazhet e sotme janë pjesë e aktiviteteve përkujtimore që Aleanca për Ardhmërinë e Kosovës organizon çdo vit për të nderuar kontributin e dëshmorëve të kombit.
