Kryetari i Lidhjes Demokratike të Kosovës (LDK), Lumir Abdixhiku, ka përjashtuar kategorikisht mundësinë e një bashkëqeverisjeje me Lëvizjen Vetëvendosje, duke theksuar se partia e tij nuk do të shërbejë si “vagon i askujt”. Në një intervistë të gjatë në emisionin “Pressing” në televizionin T7, Abdixhiku u shpreh me tone të forta ndaj zhvillimeve aktuale politike në vend, duke rikujtuar ndasitë thelbësore mes LDK-së dhe VV-së.
“Kemi dallime në substancë. Nuk bashkëqeverisim me ta. Ky është zotim i yni ndaj elektoratit tonë. Ky kryeministër në detyrë ka thënë se deputetë të LDK-së janë bashkëpunëtorë të Serbisë, e ky pret tash të ulemi e të bashkëpunojmë,” tha Abdixhiku.
Kreu i LDK-së komentoi edhe mbi krizën për konstituimin e institucioneve, duke theksuar se asnjëra nga partitë nuk ka shumicën e nevojshme për formimin e qeverisë. Ai hodhi poshtë çdo mundësi bashkëpunimi me Listën Serbe, duke u shprehur prerë: “LDK me këtë Listë Serbe nuk bashkëpunon.”
Në lidhje me dinamikat e brendshme partiake dhe presionet që mund të vijnë nga jashtë, Abdixhiku u tregua i qartë ndaj çdo zëri ndryshe brenda LDK-së:
“Rrugën çel e kanë, nëse mendojnë që duhet me tradhtu rrugën e LDK-së, urdhëroni.”
Ai gjithashtu ngriti shqetësimin për bllokimin e punës së qeverisjes lokale në Prishtinë, ku udhëheqësi komunal, Përparim Rama, sipas tij, po përballet me pengesa sistematike nga të gjitha palët politike:
“Prishtina është bërë pjesë e një beteje politike. Me të blloku bërllogun, me të çu protesta, me t’i blloku projektet.”
Abdixhiku nuk i kurseu kritikat as për Radio Televizionin e Kosovës (RTK), duke e cilësuar si “vegël e pushtetit” dhe duke theksuar se ai personalisht do të vazhdojë bojkotin ndaj këtij mediumi:
“Unë si lider i LDK-së do ta mbaj bojkotin ndaj televizionit publik si vegël dhe instrument i propagandës.”
Në një moment autokritik dhe me nota sfiduese, Abdixhiku foli edhe për rolin e shoqërisë civile dhe përpjekjet për të barazuar përgjegjësitë mes pozitës dhe opozitës:
“Ai zotëria i ka 48 deputetë edhe thotë ‘nuk kom urgjencë’ – pastaj fajet i ka LDK-ja?”
Në përmbyllje të intervistës, ai e përsëriti qartë pozicionin e partisë së tij:
“LDK nuk bëhet vagon i askujt në Kosovë. Bëhuni të sinqertë, dilni tregoni njerëzve që nuk i keni votat. Moralisht diskutojmë, por praktikisht, ne nuk jemi mjet për interesa të askujt tjetër.”
Deklaratat e Abdixhikut sinjalizojnë një pozicion të palëkundur opozitar të LDK-së, ndërkohë që skena politike kosovare vazhdon të përballet me krizë institucional dhe mungesë konsensusi.
