Kryetari i Lidhjes Demokratike të Kosovës (LDK), Lumir Abdixhiku, ka pritur sot në Selinë Qendrore ambasadorin e Republikës Federale të Gjermanisë në Kosovë, z. Jörn Rohde. Takimi u fokusua në zhvillimet e fundit politike në vend, me theks të veçantë në krizën institucionale dhe pasojat e saj mbi funksionimin demokratik të institucioneve.
Gjatë bisedës, Abdixhiku e informoi ambasadorin Rohde për propozimin e LDK-së për krijimin e një Qeverie Nacionale të Tranzicionit – një zgjidhje e përkohshme, por e domosdoshme, sipas tij, për të tejkaluar bllokadën aktuale politike dhe për të rikthyer funksionalitetin e shtetit.
Kreu i LDK-së theksoi se situata e krijuar ka çuar në paralizë institucionale, duke cenuar direkt mirëqenien e qytetarëve dhe duke penguar zhvillimin normal të proceseve shtetërore dhe institucionalizimin e mëtejmë të vendit. Ai ritheksoi se LDK-ja mbetet e vendosur kundër çdo forme të bllokadës politike dhe apelon për zgjidhje të përgjegjshme dhe konsensuale.
Në fund të takimit, Abdixhiku shprehu mirënjohje për mbështetjen e qëndrueshme të Gjermanisë ndaj Republikës së Kosovës, sidomos në rrugën e integrimit evropian, forcimin e institucioneve demokratike dhe zhvillimin ekonomik. Të dy bashkëbiseduesit rikonfirmuan përkushtimin për vazhdimin dhe avancimin e bashkëpunimit bilateral mes dy vendeve.
