Lidhja Demokratike e Kosovës mban Kuvendin e Jashtëzakonshëm, ku 355 delegatët e partisë do të vendosin sot me votë nëse Lumir Abdixhiku do të vazhdojë ta udhëheqë partinë apo do të shkarkohet nga posti i kryetarit.
Kuvendi është thirrur pasi u përmbushën procedurat statutare dhe u verifikua kërkesa e delegatëve për mbajtjen e tij. Sipas LDK-së, Sekretariati i Përgjithshëm ka konstatuar se janë plotësuar kushtet statutare, pasi kërkesa është mbështetur nga të paktën një e treta e delegatëve të Kuvendit.
“Nga ky proces është konstatuar se është përmbushur kriteri statutar prej së paku një të tretës (1/3) të delegatëve të Kuvendit, të nevojshëm për thirrjen e Kuvendit të Jashtëzakonshëm”, thuhej në njoftimin e partisë.
Kryetari i LDK-së, Lumir Abdixhiku, vendosi që Kuvendi i Jashtëzakonshëm të mbahet më 30 korrik, me fillim nga ora 18:00.
“Kryetari i LDK-së, në ushtrim të kompetencave dhe detyrimeve të përcaktuara me Statutin e partisë, ka marrë vendim për thirrjen e Kuvendit të Jashtëzakonshëm të Lidhjes Demokratike të Kosovës, pas përfundimit të procedurave statutare të verifikimit të kërkesës së paraqitur nga delegatët e Kuvendit”, thuhet në njoftim.
Nënshkrimet për thirrjen e Kuvendit u dorëzuan në mesin e muajit korrik, ndërsa Abdixhiku, pas nisjes së këtij procesi, pezulloi negociatat për formimin e institucioneve deri në përfundimin e votëbesimit ndaj tij.
Në rast se Abdixhiku e fiton besimin e delegatëve dhe mbetet në krye të LDK-së, ai pritet t’u rikthehet negociatave për formimin e institucioneve, duke pasur parasysh se seanca konstituive e Kuvendit të Kosovës është caktuar për 6 gusht.
Partia ka theksuar se i gjithë procesi do të zhvillohet në përputhje me Statutin, parimet demokratike, transparencën institucionale dhe respektimin e vullnetit të delegatëve
Para pesë vite e gjysmë, Lumir Abdixhiku mori 191 vota nga 328 delegatë të pranishëm të Kuvendit të LDK-së për ta drejtuar partinë.
58% e organit më të lartë drejtues i besuan lidershipin e partisë pas fiaskos elektorale të 14 shkurtit 2021.
Atëherë, Isa Mustafa lëshoi karrigen e të parit të partisë, duke marrë përgjegjësinë për rënien elektorale.
LDK kishte rënë në 12.7%, rezultati më i dobët ndonjëherë i partisë më të vjetër në Kosovë.
Abdixhiku e mori partinë me krenari të zellshme, duke thënë se të vjetrit “nuk kanë të drejtë të flasin.”
Pesë vite më vonë, pas tri palëve zgjedhjesh, konsiderohet t’i ketë shterruar mundësitë për ngritje elektorale.
Rezultatet e partisë kanë variuar mes 18%, 13% dhe 16% gjatë këtyre viteve.
Në janar të këtij viti, Kuvendi Zgjedhor i LDK-së e hodhi Abdixhikun në votëbesim.
Ai kaloi me legjitimitet mbijetues prej 54%, ndërsa 46% e partisë ishin kundër drejtimit të tij.
Shtatë muaj më vonë, e njëjta iniciativë është ngritur sërish kundër tij.
