Kryetari i Lidhjes Demokratike të Kosovës (LDK), Lumir Abdixhiku, ka mbajtur një fjalim motivues para Forumin Rinor të partisë, duke e cilësuar organizimin rinor si më të madhin në të gjithë Ballkanin Perëndimor. Gjatë tubimit, Abdixhiku theksoi rëndësinë e zgjedhjeve parlamentare të 9 shkurtit dhe mesazhin që ato mbajnë për të ardhmen e Kosovës.
Abdixhiku nënvizoi se këto zgjedhje nuk janë vetëm një garë politike, por një mundësi për të realizuar një ndryshim të thellë dhe të nevojshëm për vendin. Ai e cilësoi datën 9 shkurt si “përcaktuesin e të ardhmes” për qytetarët dhe shtoi se ato përbëjnë një refuzim të qartë të dështimit të shtetit.
“Për ne, këto zgjedhje janë më shumë se garë politike. Janë një refuzim kategorik ndaj dështimit të shtetit dhe një hap i guximshëm drejt ndryshimit të vërtetë. Kosova nuk mund të përballojë më dështime. Ne nuk mund ta lejojmë më largimin e të rinjve nga vendi. Koha për ndryshim është tani!” – deklaroi ai.
Abdixhiku theksoi gjithashtu se fryma e fitores dhe përbashkimit po përhapet në të gjithë Kosovën, dhe kjo lëvizje udhëhiqet nga rinia e Kosovës dhe e LDK-së. Ai falënderoi të rinjtë për energjinë dhe përkushtimin që po tregojnë dhe shprehu besimin se ata do të bëhen ndryshimi i nevojshëm në vend.
“Bashkë, do të ndërtojmë një lëvizje të shpresës dhe zhvillimit që nuk mund të ndalet,” tha Abdixhiku në fund të fjalimit.
