Adrian Bajrami është bërë zyrtarisht pjesë e kombëtares së Zvicrës, pasi FIFA i ka dhënë të mërkurën në mbrëmje autorizimin për të luajtur me skuadrën helvete. Vendimi i tij për t’u larguar nga Shqipëria u mor vetëm një ditë para grumbullimit të kuqezinjve në muajin shtator, pavarësisht se i ishte dërguar ftesa nga kombëtarja shqiptare.
Qendërmbrojtësi tashmë është përfshirë në listën e Zvicrës dhe do të jetë i gatshëm për ndeshjet e ardhshme. Trajneri i kombëtares zvicerane, Murat Jakin, gjatë një konference për shtyp, shprehu kënaqësinë për këtë afrim të ri, duke e cilësuar Bajramin si një lojtar me vlerë për skuadrën dhe një djalë të mirë mbi të gjitha.
“Jam gjithmonë shumë i lumtur kur mund të bëj një zgjedhje të tillë për skuadrën e parë. Adrian është shumë i pjekur për moshën e tij, ka kontroll të mirë me këmbën e majtë, është i fortë me topin dhe shumë komunikues si në fushë ashtu edhe jashtë saj. Jemi të kënaqur që mund t’i ofrojmë mundësinë të tregojë aftësitë e tij gjatë javës së stërvitjes, dhe do ta monitorojmë nga afër”, deklaroi Jakin.
Bajrami, edhe në moshë të re, ka treguar përgjegjësi dhe maturi në Lucernë, duke bindur trajnerin dhe stafin për përkushtimin e tij dhe vendosmërinë për të luajtur për Zvicrën.
Ky hap shënon një moment të rëndësishëm në karrierën e Bajramit dhe një fitore strategjike për kombëtaren zvicerane, e cila tani fiton një talent të ri në mbrojtje.
