Një aksion i koordinuar ndërmjet Prokurorisë Themelore në Prizren dhe Inspektoratit Policor të Kosovës (IPK) ka rezultuar me bastisjen e katër lokacioneve dhe arrestimin e katër personave të dyshuar, përfshirë një zyrtar të lartë të Policisë së Kosovës.
Burime të sigurta konfirmojnë për media se në mesin e të arrestuarve është koloneli Nexhmi Krasniqi, zyrtar i lartë policor, ndaj të cilit dhe tre të dyshuarve të tjerë ekziston dyshimi i arsyeshëm për përfshirje në veprat penale të detyrimit dhe shmangies nga tatimi, të cilat sanksionohen nga Kodi Penal i Republikës së Kosovës.
Kryeprokurori i Prizrenit, Petrit Kryeziu, ka konfirmuar arrestimin, ndërsa IPK ka njoftuar se aksioni është rezultat i një hetimi disa mujor të zhvilluar me profesionalizëm dhe përkushtim nga hetuesit e IPK-së në bashkëpunim të plotë me organet e drejtësisë.
Aktualisht, hetimet po vazhdojnë në terren me qëllim të zbardhjes së plotë të çështjes dhe sigurimit të provave relevante. Si pjesë e procedurave administrative, IPK ka rekomanduar edhe suspendimin e kolonelit Krasniqi, në pritje të hetimeve të mëtejshme.
Institucionet e zbatimit të ligjit kanë theksuar përkushtimin e tyre për një bashkëpunim ndërinstitucional dhe për vendosmërinë në luftën kundër çdo forme të krimit, përfshirë edhe atë që kryhet nga zyrtarë publikë.
