Policia e Kosovës, në bashkëpunim me Prokurorinë dhe Agjencinë Kosovare të Inteligjencës (AKI), ka ndërmarrë një aksion të madh antidrogë në fshatin Zhegovc të Gjilanit.
Zëdhënësi i Policisë për rajonin e Gjilanit, Fadil Hoti, ka konfirmuar për Insajderin se gjatë këtij operacioni janë zbuluar disa sera të përdorura për kultivimin e lëndëve narkotike.
Sipas informacioneve të para, në vendin e ngjarjes është sekuestruar edhe një armë zjarri, ndërsa tre persona janë arrestuar. Operacioni është zhvilluar në koordinim të ngushtë me AKI-në, e cila ka ndihmuar në identifikimin e lokacionit dhe personave të dyshuar për përfshirje në këtë veprimtari kriminale.
Aksioni policor është ende në zhvillim, ndërsa Insajderi ka siguruar pamje ekskluzive nga vendi i ngjarjes në Zhegovc.
