Një aksion i gjerë i Policisë së Kosovës është duke u zhvilluar në Prizren, në kuadër të hetimeve për keqpërdorime dhe mashtrime gjatë procesit të numërimit të votave në zgjedhjet e parakohshme parlamentare të 28 dhjetorit.
Burime të Paparacit bëjnë të ditur se gjatë këtij operacioni janë realizuar një numër i madh bastisjesh, ndërsa pritet që rreth 50 persona të arrestohen. Të dyshuarit janë kryesisht komisionerë zgjedhorë, vëzhgues dhe persona të tjerë të përfshirë në procesin zgjedhor.
Sipas informatave, personat e dyshuar tashmë janë shoqëruar në stacionin policor, ku po iu konfiskohen telefonat mobil dhe po procedohen për arrestim, në kuadër të hetimeve që lidhen me manipulimin e votave.
Hetimet vijnë pas dyshimeve të shumta për parregullsi gjatë numërimit të votave, çka kishte shtyrë Komisionin Qendror të Zgjedhjeve (KQZ) të marrë vendim për rinumërimin e votave në të gjitha vendvotimet.
Autoritetet pritet të dalin me informacione zyrtare gjatë orëve në vijim, ndërsa aksioni konsiderohet një nga më të mëdhenjtë që lidhet drejtpërdrejt me integritetin e procesit zgjedhor në Kosovë.
