Sektori i Hetimeve të Kryeqytetit ka arrestuar tre persona të dyshuar për përfshirje në raste të vjedhjeve të rënda në territorin e Prishtinës.
Sipas njoftimit të Policisë, pas veprimeve intensive hetimore, janë arrestuar të dyshuarit me inicialet E.P. (18 vjeç), E.H. (26 vjeç) dhe E.P. (16 vjeç), të gjithë shtetas të Republikës së Kosovës.
Policia ka bërë të ditur se pas arrestimit, hetuesit kanë vazhduar me procedurat e nevojshme hetimore për zbardhjen e plotë të rasteve dhe dokumentimin e veprave penale që u vihen në barrë të dyshuarve.
Në koordinim me Prokurorin e Shtetit, është marrë vendimi që tre të dyshuarit të ndalohen, ndërsa hetimet lidhur me rastin janë duke vazhduar.
Autoritetet nuk kanë bërë të ditur detaje shtesë për numrin e vjedhjeve apo dëmin e shkaktuar, ndërsa pritet që pas përfundimit të procedurave hetimore të publikohen informacione të tjera lidhur me rastin.
