Policia e Kosovës ka ndërmarrë sot një operacion të koordinuar në fshatin Shtedim të Podujevës, ku janë arrestuar shtatë persona të dyshuar për përfshirje në veprimtari të paligjshme me substanca narkotike.
Sipas njoftimit zyrtar, aksioni është zhvilluar rreth orës 12:00, nga njësitë e hetimeve të Stacionit Policor në Podujevë, në bashkërendim me prokurorin e shtetit. Operacioni u bazua në informata operative, që çuan në lokalizimin e një objekti banimi në të cilin dyshohej për kultivim dhe përpunim të lëndëve narkotike.
Gjatë kontrollit në shtëpinë e identifikuar, policia ka arrestuar shtatë persona – pesë femra dhe dy meshkuj – të gjithë shtetas të Republikës së Shqipërisë.
Në vendngjarje është gjetur një sasi e konsiderueshme e substancave narkotike, si dhe pajisje të përshtatura për tharjen e bimëve narkotike.
Në operacion morën pjesë edhe njësitë intervenuese të Policisë së Kosovës, ndërsa pas arrestimit, në koordinim me njësinë antidrogë, janë ndërmarrë veprimet e mëtejme hetimore.
Autoritetet po vazhdojnë me procedurat ligjore për ndriçimin e plotë të rastit.
